Nura ózeninde muz jarý jumystary júrgizildi - Qaraǵandy oblysy

QARAǴANDY. QazAqparat – Qaraǵandy oblysynyń TJ departamenti óńirde muz jarý jumystaryn bastady. Búgingi kúni Nura ózeniniń Botaqara kentindegi, Petrovka, Jastilek eldi mekenderindegi jáne Birinshi Mamyr aýylyndaǵy tórt ýchaskede osy sharalar atqaryldy, dep habarlaıdy QazAqparat tilshisi.

Sondaı-aq sý tasqynyna daıyndyq barysy oblys ákimi Jeńis Qasymbektiń tóraǵalyǵymen ótken tótenshe jaǵdaılar jónindegi óńirlik komıssııanyń kezekti otyrysynda talqylandy.

Qaraǵandy oblysyndaǵy sý tasqyny jaǵdaıy turaqty. Ózen basseınderindegi sý qory normadan 28%-ǵa tómen, dep atap ótti Qazgıdromet fılıalynda.

Sonymen qatar, óńirde 1-14 naýryz aralyǵynda 15 mm qar jaýdy. Bul aılyq normanyń 100%

quraıdy. 21 naýryzdan bastap TJD-men birlesip qardyń sońǵy ólshemi ótkiziledi.

«Kosmomonıtorıng derekteri boıynsha oblys aýmaǵynyń 68%-yn búgingi kúni qar basyp jatyr.

Tek oblystyń soltústik-shyǵys jáne ońtústik shekaralarynda jer qaraıa bastady. Qazgıdromet Nura,Sherýbaı-Nura, Sarysý, Keńgir, Toqyraýyn ózenderiniń basseınderindegi ylǵal qorynyń kólemi

ortasha kópjyldyq mánnen 10-45%-ǵa tómen ekenin málim etti», - dedi TJD basshysy Murat Qatpanov.

Samarqand jáne Yntymaq sý qoımalarynan sanıtarlyq sý aǵyzýlar júrgizilýde. Erigen qar

sýynyń kelýimen barlyq sý qoımalarynda tolyq tógindiler bastalady.

Joldarǵa erekshe nazar aýdaryldy. 320 kópir men 3 673 sý ótkizý qubyry tazartyldy.

Respýblıkalyq mańyzy bar trassalardaǵy sý ótkizý qubyrlary tolyǵymen daıyndyqqa keltirilgen. Oblystyq jáne aýdandyq mańyzy bar avtojoldardyń 69 sý tasqyny qaýpi bar ýchaskeleri baqylaýǵa alyndy.

Materıaldyq-tehnıkalyq quraldar men ınertti materıaldar qoryna tekserý júrgizildi.

TJ departamenti 80-nen astam arnaıy, ótimdiligi joǵary jáne ınjenerlik tehnıka, sonyń ishinde halyqty tasymaldaý jáne evakýatsııalaý úshin, batpaq-jol talǵamaıtyn kólikter, júzý quraldary, motopompalar daıyndady. Sý tasqyny qaýpi bar óńirlerde jeke quram gıdrokostıýmdarmen jabdyqtalǵan.

Jeńis Qasymbek 20 naýryzǵa deıin barlyq kemshilikterdi joıýdy tapsyrdy. Gıdroqurylystardyń tasqyn sýlardy apatsyz ótkizýge barynsha daıyndyǵyn qamtamasyz etý qajettigin eske saldy.

Halyqtyń kólik qatynasymen problemalary bolmaýy úshin avtojoldardyń rekonstrýktsııalanatyn ýchaskelerin erekshe baqylaýǵa alý jáne kenttik joldardyń daıyndyq jaǵdaıyn tekserý tapsyryldy. Óńir basshysy ákimderdi syrttan ǵana baqylap qoımaı, belsendi atsalysýǵa shaqyrdy.

«Bizdiń negizgi mindetimiz – turǵyndardyń qaýipsizdigin, sharýashylyq júrgizýshi sýbektilerdiń, tirshilikti qamtamasyz etý obektileriniń jáne kólik ınfraqurylymynyń aýmaqtaryn qorǵaýdy qamtamasyz etý. Múmkindiginshe materıaldyq shyǵyn kólemin boldyrmaý nemese barynsha azaıtý.

Árqaısysyńyzdan jaýapkershilik talap etiledi», - dep atap ótti oblys ákimi.