Nura aýdanynyń ákimi mal aýrýyna baılanysty túsinik berdi

ASTANA. QazAqparat - Qaraǵandy oblysy Nura aýdanynyń eki eldi mekende iri qara mal aýrýy anyqtalǵan. Myńbaev atyndaǵy aýylda 21 iri qara tólderimen qosa qyrylǵan. Aldyn ala boljam boıynsha olardyń barlyǵy pasterellez juqtyrǵan, dep habarlaıdy QazAqparat Qaraǵandy oblysy ákimdiginiń saıtyna silteme jasap.

Bul oqıǵa týraly Nura aýdanynyń ákimi Nıqanbaı Omarhanov túsinik berdi.

«Myńbaev atyndaǵy aýylda 1 maýsymda bir buzaý aýyrǵan. Sol kúni janýar aram óldi. Bolǵan oqıǵa jaıly birden oblys ortalyǵyna habarlama jiberildi. 2 maýsymda oqıǵa ornyna veterınarlyq ınspektsııa men veterınarııa basqarmasynyń basshylary bastaǵan arnaıy mamandar keldi. Sonymen qatar aýylǵa maldy baqylaýǵa jergilikti veterınarııalyq qyzmet jumyskerleri jiberilgen. Qan analızderi zerthanaǵa zertteýge jiberildi. Saraptama qorytyndylaryn kútpesten mamandar antıbıotıktermen emdeýdi uıǵarǵan. Sonymen birge maldy dezınfektsııalyq zattarmen jáne veterınarııalyq dárilermen óńdedi», - deıdi aýdan basshysy. 
Onyń málimdeýinshe, búgingi tańda aýdannyń eki eldi mekeninde aýrý belgileri 52 sıyrda baıqalǵan. «Myńbaev atyndaǵy aýylda 21 iri qara qyryldy, onyń ishinde buzaýlar da bar. Al kórshi Zarechnoe aýylynda aýrý belgileri tirkelgen, biraq mal ólmegen», - deıdi Nıqanbaı Omarhanov. 

Aýdan ákiminiń aıtýynsha, jedel jumystardyń arqasynda indet oshaǵy shoǵyrlanyp, aýrýdyń tarap ketýin boldyrmas úshin sharalar qoldanǵan. 
«Bir sátte jumystarymyz jumyldyryldy. Jaǵdaı baqylaýda, - dedi aýdan basshysy. - Men ózim sol aýyldarda bolyp, barlyq aýlalar men qoralardy aralap shyǵyp, mal ıelerimen áńgimelesip shyqtym. Olardyń ýájderin tyńdap, sabyrǵa keltirdim. Olardy da túsinýge bolady - otbasyn sol malmen asyrap otyr». 
Qyrylǵan maldardyń ıeleri ótemaqy alatyn bolady dedi ol. «Aldymen indetti toqtatýymyz kerek. Sonan soń shyǵyndy esepteımiz. Birde bir adam ótemaqysyz qalmaıdy. Adamdardyń tilegin eskeremiz. Keıbiri aqshalaı alǵysy keledi, keıbiri mal alamyz deıdi. Qazirgi tańda aldymyzda eki negizgi mindet tur - durys dıagnoz qoıyp, indetti toqtatý jáne aýrý kózin anyqtaý», - deıdi Nıqanbaı Omarhanov.
Mamandardyń aıtýynsha, dert kózi ártúrli bolýy múmkin - sý, ýlanǵan shóp, aýa arqyly taraǵan.
Aýyldarda qazir 16 vetınspektorlar jumys istep jatyr. Qyrylǵan maldardy arnaıy mal qorymyna tasýda. Mal qyrylǵan Myńbaev atyndaǵy aýyldyń kireberisinde dezınfektsııalyq bógeýler tur. Kólikterdiń júrýi jergilikti polıtsııa qyzmetimen qadaǵalanýda. 

«Jaqyn ýaqytta zerthanalyq saraptama nátıjelerin kútip otyrmyz. Sol kezde naqty dıagnoz anyqtalady», - dedi aýdan ákimi.