«Nur joly» ótkizý pýnktindegi júk kólikteriniń jınalyp qalý máselesi qalaı sheshilýde
«Koronavırýs pandemııasyna baılanysty Qytaı tarapy óz shekarasyna kiretin avtokólik quraldarynyń sanyn azaıtty. Sondaı-aq, olar avtokólik quraldary men júrgizýshilerdi sanıtarlyq tekseristen ótkizý sharalaryn kúsheıtti. Osynyń saldarynan eki eldiń arasynda birshama kólik jınalyp qalyp jatyr. Tasymaldaýshylardyń basym bóliginde (shamamen 80%) júkterdi tasymaldaýǵa naqty tapsyrystar men sharttardyń bolmaýy da qıyndyq týdyrǵanyn aıta ketý kerek. Olar sol jerde bir jolǵy mámile jasasý maqsatynda QHR aýmaǵyna barady. Alaıda qytaı tarapy olarǵa óz aýmaǵynda júkti tıeý jáne keri shyǵý úshin 48 saǵat ýaqyt beredi. Osydan baryp júrgizýshiler QHR-ǵa qaraı beıtarap jolaqqa qaıta kezekke turady. Kólik taǵy jınalady», - deıdi Tólegen Baıǵulov agenttiktiń Facebook paraqshasynda ótken onlaın baspasóz máslıhatynda.
Onyń aıtýynsha 2020 jylǵy 1 shildesinen bastap «Qaljat», «Baqty» jáne «Maıqapshaǵaı» ótkizý pýnktteri ashylǵan. Olar buryn ýaqytsha jabylǵan bolatyn. Áıtse de qazir osy pýnkttermen bekettes Qytaı tarapynan ótkizý pýnktteri jabyq bolǵandyqtan ol jaqtardan taýar toly kólikter óte almaıdy. Osyǵan baılanysty negizgi júkteme «Nur joly» ótkizý pýnktine túsip tur.
«Týyndaǵan jaǵdaıdy retteý maqsatynda 2020 jyldyń 9 qyrkúıeginde aprobatsııa sheńberinde gocargo.kz elektrondyq kezek júıesi iske qosyldy. Osynyń nátıjesinde avtokólik quraldary «Nur joly» ótkizý pýnktine saıtta tirkelý jáne elektrondy kezek boıynsha kire alatyn boldy. Bul rette júıe taýar sanatyna baılanysty (eksport, gýmanıtarlyq júkter jáne t. b.) kólik kezegin jolǵa qoıady. Sondaı-aq avtokólik quraldarynyń Qazaqstan aýmaǵyna sońǵy kelgen sátinen bastap keminde 14 kún buryn qaıta júrip ótýi shekteledi», - deıdi ol.
Tólegen Baıǵulov bul júıe ishki ister, memlekettik kirister jáne kóliktik baqylaý organdarynyń bazalarymen ıntegratsııa kezeńinde turǵanyn jetkizdi.
«Osy jyldyń 1 qazanynan bastap ol tolyǵymen engiziletin bolady. Sondaı-aq, memlekettik kiris organdary Qytaı tarapynan «Qaljat», «Baqty» jáne «Maıqapshaǵaı» ótkizý pýnktterin ashý boıynsha QHR tarapynan Úkimet deńgeıinde kelissózder júrgizý týraly hatqa bastamashylyq etti. Bul ótkizý pýnktteriniń kedendik ákimshilendirýdi júrgizý úshin barlyq qajetti ınfraqurylymy bar. Sondaı-aq ótkizý pýnktinde óz qyzmetin «EurotransitLogistic» JShS Saýda-logıstıkalyq ortalyqtary júzege asyrady», - deıdi ol.
Onyń sózinshe búgingi tańda «Nur Joly» keden beketinen kólik quraldarynan aqyly termınalǵa deıingi jol bóliginde kólik quraldarynyń jınalý jaǵdaıy tómendegen. Júrgizýshiler tarapynan tolqý joq. Qytaı tarapy ortasha eseppen táýligine 60-tan 80-ge deıin kólik quralyn qabyldaıdy.