«Nur joly» beketinde 15 kúnde shetel valıýtasyn tasymaldaýdyń 5 faktisi anyqtaldy

ASTANA. QazAqparat – «Nur joly» keden beketinde 15 kún ishinde shetel valıýtasyn tasymaldaý boıynsha 5 fakti anyqtaldy. Bul týraly QazAqparat Jetisý oblysy boıynsha Memlekettik kirister departamentiniń baspasóz qyzmetine silteme jasap habarlaıdy.

Jetisý oblysy boıynsha Memlekettik kirister departamenti qorǵanys kesheniniń shekaralyq baqylaý qyzmetkerlerimen birlesip, Qazaqstan Respýblıkasynan Qytaı Halyq Respýblıkasyna shyǵýdyń ákimshilik zalynda 15 kún ishinde shetel valıýtasyn tasymaldaýǵa tyrysýdyń 5 faktisin anyqtady.

Qytaı azamatynan 16 naýryzda 10 myń AQSh dollary, 1 100 ıýan jáne 73,5 myń teńge somasynda deklaratsııalanbaǵan qarajat anyqtaldy. 18 naýryz kúni Tájikstan azamaty 11 875 AQSh dollaryn, al 25 naýryz kúni Qytaı azamattary 5 mln teńge, 416 ıýan jáne 1,7 mln teńge jáne 14 500 AQSh dollaryn deklaratsııalamaǵany anyqtaldy. Sáýirdiń basynda Qytaı azamaty 15 500 AQSh dollaryn deklaratsııalamaı alyp ótpek boldy.

Barlyq faktiler boıynsha ákimshilik materıaldar toltyryldy.

Jetisý oblysy boıynsha memlekettik kirister departamenti Qazaqstan Respýblıkasy Prezıdentiniń 2022 jylǵy 14 naýryzdaǵy №830 Jarlyǵyna sáıkes, Qazaqstan Respýblıkasynyń Ulttyq Banki áketý kúnine belgilengen baǵam boıynsha eseptelgen jáne 10 000 (on myń) AQSh dollary balamasynan asatyn somadaǵy qolma-qol shetel valıýtasyn jáne (nemese) shetel valıýtasyndaǵy aqsha quraldaryn áketýge tyıym salynǵan eske salady.