«Nur Suńqar» syılyǵy talantty jýrnalısterge tabystaldy»-respýblıkalyq basylymdarǵa sholý
Keshe Parlament Senatynyń Tóraǵasy Qaırat Mámı tórtinshi shaqyrylǵan Parlamenttiń tórtinshi sessııasynyń qorytyndylary boıynsha baspasóz máslıhatyn ótkizdi. Osy jaıt arqaý bolǵan maqala «Egemen Qazaqstan» gazetiniń búgingi sanynda «Senat óz mindetin tolyq oryndady» degen taqyryppen berildi. Basylymnyń atap ótýinshe, Senattyń osy sessııadaǵy qyzmeti negizinen Elbasynyń «Bolashaqtyń irgesin birge qalaımyz» atty Joldaýynda belgilengen strategııalardy, sondaı-aq memlekettiń syrtqy jáne ishki saıasatyndaǵy mańyzdy mindetterdi oryndaýǵa baǵyttalǵan sharalardy quqyqtyq turǵydan qamtamasyz etýge arnalyp, barlyǵy 140 zań qabyldandy.
«Egemen Qazaqstan» gazetiniń jazýynsha, Astanada elimizdiń Premer-Mınıstri - Nazarbaev Ýnıversıteti Qamqorshylyq keńesiniń tóraǵasy Kárim Másimov sheteldik JOO-seriktester ókilderimen kezdesý ótkizdi. Kezdesý barysynda Premer-Mınıstr Nazarbaev Ýnıversıteti men Intellektýaldyq mektepter jelisin elimizdiń ındýstrııalyq damýyna arnalǵan ozyq tehnologııalar men ınnovatsııalardy ázirleý jáne engizý júıesine aınaldyrýǵa qyzyǵýshylyq bildirdi.
***
«Qylmystyq atqarý júıesi salasynyń qyzmetkerleri osy jyldyń alty aıy ishinde elimizdiń túrmelerine zańsyz jolmen ótkizilmekshi bolǵan 2,2 mıllıard teńgeni tárkiledi. Ádilet mınıstrligi Qylmystyq atqarý júıesi komıtetiniń tóraǵasy Sultan Kúsetov keshe osyndaı málimdeme jasady», - dep jazady «Aıqyn» gazeti «Túrmeden 2,2 mlrd teńge «tabyldy» degen maqalasynda. «Jyl basynan bergi merzim aralyǵynda túrmede otyrǵan jazalanýshylarǵa zańsyz ótkizilýi tıisti bolǵan 2,2 mıllıard teńgemen qosa, 60 keliden astam esirtki jáne jalpy salmaǵy 6 tonnadan astam alýan túrli ishimdik tárkilendi», - depti ol.
«Nur Otan» partııasynyń bastamasymen byltyr qolǵa alynǵan «Nur Suńqar» baıqaýy bıyl da uıymdastyryldy. Dástúr jalǵastyǵyna ulasyp úlgergen dúbirli dodada jýrnalıstıkanyń jalyna jarmasyp júrgen jandar qurmet pen qoshemetke keneldi. Bul jaıynda «Aıqyn» gazetindegi «Nur Suńqar» syılyǵy talantty jýrnalısterge tabystaldy» degen maqalada egjeı-tegjeıli baıandalǵan.
***
«Alash aınasy» gazetiniń turaqty «Dat!» aıdarynda Qazaqstan Jýrnalıster odaǵynyń tóraǵasy Seıitqazy Mataevpen aradaǵy suhbat «Bılik BAQ-pen sanasýy kerek, áıtpese taıaqtyń bir ushy ózine tıedi» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Keńes Odaǵy kekzinde jýrnalısterge erekshe jaǵdaı jasalatyn. Jýrnalıster odaǵynyń múshesi bolǵan azamatqa qosymsha toǵyz sharshy metrlik baspana alańy beriletin. Al Táýelsiz Qazaqstannyń jýrnalısi baspanasyn da, basqasyn da oılap, basyn qatyrýmen júr. Muny men birneshe márte kóterip kelemin. Osy turǵydan aıtarym, Qazaqstan jýrnalısteriniń óz mártebesi (statýsy) bolýy kerek», - depti.
«Batys Qazaqstan oblysynda aýsylǵa uqsas aýrý juqtyrǵan maldyń qatary kóbeıip ketti. Keshe órtelgen iri qara men usaq maldyń sany 900-den asqany habarlandy», - dep jazady «Alash aınasy» gazeti. Tótenshe jaǵdaılar mınıstrligi mamandarynyń málimetinshe, maýsymnyń 22-si kúngi esep boıynsha barlyǵy 205 iri qara men 709 qoı-eshki órtelgen. Bul - indet shyqqan Lbışensk aýylyndaǵy mal basynyń úshten birine jýyq. Qazirgi ýaqytta aýylda veterınarlyq baqylaý turaqtary ornatylyp, saqtyq sharalary kúsheıtilip otyr. Maqala «Aýrý juqtyrǵan maldyń qatary kóbeıip barady» degen taqyryppen berilgen.
***
«Keshe Astanada QR Qaýipsizdik keńesi janyndaǵy saraptamalyq keńestiń qatysýshylary Qazaqstandaǵy etnodinı ahýaldy damytý máselelerin talqylady», - dep jazady «Kazahstanskaıa pravda» gazeti. Talqylaý barysynda QR Prezıdentiniń kómekshisi - Qaýipsizdik keńesiniń hatshysy Marat Tájın talqylaý barysnyda aımaq pen álemdegi jańa úrdisterdi, Qazaqstannyń áleýmettik-saıası damýynyń dınamıkasy týraly atap ótken.