Nur-Sultannyń monıtorıngtik toptary karantın talabyn buzǵan 9 mekemeni anyqtady

NUR-SULTAN. QazAqparat - Elordanyń monıtorıngtik toptary birneshe aı boıy táýlik boıy jumys istep, qalanyń kásipkerlik nysandarynda karantın talaptarynyń saqtalýyn tekserdi. Ótken táýlikte 9 mekemede shekteý sharalarynyń saqtalmaǵany tirkeldi, dep habarlaıdy QazAqparat qala ákimdiginiń resmı saıtyna silteme jasap.

Keshe, 16 qyrkúıekte monıtorıngtik toptar qalanyń 9 kásipkerlik obektisinde buzýshylyqtardy anyqtady.

Saryarqa aýdanyndaǵy «Good Game» oıyn klýby karantın talaptaryn elemegen. Baıqońyr aýdanynda ornalasqan «Panaehalı» barynda da shekteý sharalary saqtalmady. Almaty aýdanynda «F16-ZEINE» kafesi jumys rejımin buza otyryp jumys istedi.
Esil aýdanynda karantın buzýshylar tizimine 6 qoǵamdyq tamaqtaný oryndary kirdi: «Khan El Khalili» kafesi, «INCOGNITO» karaoke-bary, «LOTO CLUB» klýby, «Tequila» bary, «Bariton» bary jáne «Panaehalı»kafesi.

Tártip buzýshylarǵa qatysty barlyq jınalǵan materıaldar tıisti ákimshilik sharalar qabyldaý úshin sanıtarııalyq-epıdemıologııalyq baqylaý salasyndaǵy ýákiletti organǵa berildi.

Aıta ketý kerek, COVID-19-ben aýyrǵandar sanynyń tómendeýine qaramastan, Nur-Sultan epıdemıologııalyq ahýaldy baǵalaý boıynsha «qyzyl» aımaqta qalyp otyr. Sondyqtan elorda turǵyndary men qonaqtary betperde kııý rejımin, áleýmettik qashyqtyqty, qol gıgıenasyn qatań saqtaýy tıis. Azamattar ózderiniń jáne aınalasyndaǵylardyń densaýlyǵyn saqtaý úshin koronavırýsqa qarsy vaktsınatsııadan ótýi kerek, óıtkeni vaktsınamen ımmýndaý qaýipti vırýspen kúresýdiń jalǵyz tıimdi ádisi bolyp tabylady.