Nur-Sultannyń aınalasyna 6 blokpost qoıyldy

NUR-SULTAN. QazAqparat – Tótenshe jaǵdaı rejımine baılanysty Nur-Sultannyń aınalasyna alty blokpost qoıylǵan, dep habarlaıdy QazAqparat Habar 24 arnasyna silteme jasap.

Elordaǵa kirip-shyǵatyn joldar ýaqytsha jabyldy. Qala aýmaǵyna alty blokpost qoıylǵan.

Olar Qaraǵandy, Qosshy, Kókshetaý, Pavlodar, Qorǵaljyn jáne Astrahan baǵyttary boıynsha shaharǵa kireberiste tur.

Bas qalada keshki 23.00-den tańǵy saǵat 7.00-ge deıin komendanttyq saǵat engizilgen. Shekteý sharalary qoǵamdyq tártip pen adamdardyń qaýipsizdigin qamtamasyz etýge baǵyttalǵan.

Jalpy, shahardaǵy ahýal tártip saqshylarynyń tolyq baqylaýynda.

«Osy ýaqytta turǵyndar men kóliktiń júrýine bolmaıdy. Tek qalanyń tynys-tirshiligin qamtamasyz etetin mekemelerdiń qyzmetkerleri men kóligi arnaıy ruqsatpen júre alady. Jalpy, elorda turǵyndaryna aıtarym – qoǵamdyq oryndarǵa barmaýǵa tyrysyńyzdar, múmkindiginshe úıde otyryńyzdar, balalardy kózden tasa etpeńizder», - deıdi Nur-Sultannyń bas komendanty, qalalyq polıtsııa departamentiniń bastyǵy Erjan Sádenov.