Nur-Sultannan poıyzǵa mingen mas jolaýshy reısten túsirildi

NUR-SULTAN. QazAqparat – «Nur-Sultan – Oral» baǵytyndaǵy poıyzda mas jolaýshy reısten túsirilip, aıyppul salyndy, dep habarlaıdy QazAqparat tilshisi.

Kóliktegi polıtsııa departamentiniń málimetinshe, «Nur-Sultan – Oral» baǵytyndaǵy jolaýshylar poıyzynyń bastyǵy Kókshetaý stansasyndaǵy Jelilik polıtsııa bólimine vagondardyń birindegi mas jolaýshy týraly habarlaǵan. Tekserý barysynda túngi ýaqytta masań kúıde eskertýlerge qaramastan, bylapyt sózder aıtyp, jolaýshylardyń tynyshtyǵyna kedergi keltirgen Shyǵys Qazaqstan oblysynyń 35 jastaǵy turǵyny anyqtalǵan.

«Poıyz bastyǵy jolaýshynyń teris áreketi týraly akt jasap, soǵan baılanysty ony odan ári tasymaldaýdan bas tartyldy. Medıtsınalyq kýálandyrý qorytyndysyna sáıkes, er azamat «ortasha» dárejedegi alkogoldi masań kúıde bolǵan. Kókshetaý stansasynyń JPb qyzmetkerleri quqyq buzýshyǵa qatysty QR ákimshilik zańnamasynyń úsh baby boıynsha, ıaǵnı, QR ÁQBK 434-baby 1-bóligi «Usaq buzaqylyq», QR ÁQBK 440-baby 1-bóligi «Qoǵamdyq orynǵa mas kúıinde kelý», QR ÁQBK 437-baby 1-bóligi «Tynyshtyqty buzý» boıynsha ákimshilik is qozǵap, 13 255 teńge kólemindegi aıyppul túrinde ákimshilik jaza qoldandy», - dep atap ótedi departamentten.

Aıta keterligi, osy jyldyń basynan beri elimizdiń kólik polıtseıleri túrli ákimshilik quqyq buzýshylyq jasaǵan 2 248 azamatty jaýapkershilikke tartty. Onyń ishinde alkogoldi ishimdik ishken nemese qoǵamdyq oryndarǵa masań kúıde kelgen 251 adam bar.