Nur-Sultandaǵy saılaý naýqany óte ashyq bastaldy - Ekaterına Goloýlına

NUR-SULTAN. QazAqparat - TMD Parlamentaralyq assambleıasynyń demokratııanyń damýyn monıtorıngteý halyqaralyq ınstıtýty dırektorynyń orynbasary Ekaterına Goloýlına Qazaqstan astanasynda saılaý naýqanynyń ashyq ótip jatqanyn aıtty, dep habarlaıdy QazAqparat tilshisi.

Búgin QR Ortalyq saılaý komıssııasynyń músheleri TMD Parlamentaralyq assambleıasynyń atynan kelgen halyqaralyq baıqaýshylarmen kezdesti.

Sharada TMD baıqaýshylaryna saılaý naýqanynyń barlyq kezeńderi týraly tolyqqandy aqparat berildi. Kezdesýden keıin BAQ ókilderine suhbat bergen halyqaralyq baqylaýshylar alǵashqy áserlerimen bólisti.

«Nur-Sultanda ekinshi kún júrmiz. Ázirge munda bolyp jatqan sharalardyń barlyǵy ashyq ótip jatyr dep aıtýǵa negiz bar. BAQ taratqan jańalyqtardy kóz jazbaı baqylap otyrmyz. Soǵan qarap saılaý naýqany óte ashyq, jarqyn bastaldy dep aıtýǵa bolady», - dedi Ekaterına Goloýlına.

Halyqaralyq baıqaýshynyń aıtýynsha, bul saılaýǵa TMD Parlamentaralyq assambleıasy eki kezeńde monıtorıng júrgizbek. Qysqa merzimdi monıtorıng Qazaqstannyń 6 óńirin qamtysa, uzaq merzimdi baqylaý 9 oblysta júrgiziledi.

«Bul jolǵy prezıdent saılaýynyń biregeıligin atap ótý kerek. Kandıdat usynýshy uıymdardyń san qyrly ekenin kórdik. Onyń ústine birinshi ret áıel úmitker baǵyn synamaqshy. Sondyqtan, eldiń ár óńirin qamtyǵymyz keledi. Qazaqstan aýmaǵynda bizdiń baqylaýshy toptan basqa Parlamentaralyq assambleıanyń taǵy bir sarapshylyq toby Almaty men Shymkentte júr. Jalpy TMD atynan 8 eldiń baıqaýshylary kelip, el aýmaǵynyń 50 paıyzyn qamtýy tıis» - deıdi Ekaterına Goloýlına.

Foto: www.election.gov.kz