Nur-Sultandaǵy ǵımarattar normatıvten eki ese kóp energııa tutynady - BUU

NUR-SULTAN. QazAqparat – Nur-Sultan qalasyndaǵy ǵımarattar normatıvten eki ese kóp energııa tutynady. Bul týraly jylýmen qamtý sektorynda balamaly qýat kózderiniń úlesin arttyrý máselesine baılanysty elordada ótken kosýltatıvti sessııada BUU Damý baǵdarlamasy jobalarynyń menedjeri Aleksandr Belyı málim etti, dep habarlaıdy QazAqparat tilshisi.

«Energııa tıimdiligine qol jetkizý úshin turǵyn úı qunyn qanshalyqty kóterýge bolatynyna taldaý jasalǵan bolatyn. Ońtaıly boljam aıqyndaldy: baspana 10 paıyzǵa qymbattasa, shamamen 30-40 paıyzdyq energııany únemdeýge bolar edi. Qaraǵandy qalasynda turǵyn úı maqsatynda 9 qabatty ǵımarat turǵyzyldy. Onda alǵash ret jylýdy qalpyna keltirý júıeleri qoldanyldy. Qazaqstanda bul júıelerge qatysty belgili bir qıyndyqtar bar. Sondaı-aq, osy joba aıasynda elordadaǵy 50 ǵımarattan synama alyndy, olardyń energııa tutyný deńgeıi taldandy», - dedi Aleksandar Belyı.

Onyń aıtýynsha, 2010 jyldan keıin elordada salynǵan ǵımarattardyń 25 paıyzy energııa tıimdiliginiń mınımaldy satysyna da saı kelmeıdi.

Aleksandr Belyı, sonymen birge Nur-Sultandaǵy ǵımarattar orta eseppen Qazaqstanda bekitilgen normatıvterden eki ese kóp energııa tutynatynyn atap ótti. Onyń aıtýynsha, turǵyn úıdiń 1 sharshy metrine salynǵan 8 dollar - energııany 9 paıyz únemdeýge, sharshy metrine salynǵan 50 dollar - 41 paıyz únemdeýge múmkindik beredi.

BUU DB menedjeri atap ótkendeı, ortalyqtandyrylǵan jylýmen qamtý aýmaǵynda shaǵyn jańǵyrtylatyn energııa kózderiniń, mysaly, kún panelderiniń paıdasy joq. Menedjerdiń aıtýynsha, Nur-Sultandaǵy jylý energııasy qunynyń tómendigi sonshalyq, jańa úılerdiń turǵyndary ǵımarattyń jylý júıesin jańǵyrtýǵa qyzyǵýshylyq tanytpaıdy.