Nur-Sultandaǵy Almaty, Saryarqa aýdandary gazben tolyq qamtyldy – elorda ákimi
«Elorda turǵyndarynyń jyl sanap artyp kele jatqany áleýmettik nysandar men ınjenerlik jelilerge de qosymsha kúsh túsirip otyr. Ásirese sý jáne jylýmen jabdyqtaý, elektr jáne káriz jelisi, sol sııaqty nóser kárizderine salmaq basym. Buǵan deıin jylý elektr ortalyǵy qurylysynyń júrip jatqany jáne qalany gazben jylytý qazandyqtarynyń iske qosylatyny týraly aıtyldy. Ózderińiz biletindeı, qalany gazdandyrý jumysy qarqyndy júrip jatyr. Búginde Almaty jáne Saryarqa aýdandary tolyǵymen gazdandyryldy. Ol úshin 680 shaqyrymnan astam gaz taratý jelisi salyndy», - dedi Altaı Kólginov qalalyq máslıhattyń kezekten tys sessııa otyrysynda.
Sondaı-aq, ákim qalǵan eki aýdanǵa da gaz jelisi tartylatynyn jetkizdi.
Qala basshysynyń aıtýynsha, búginde káriz tazartý qurylysyn jobalaý men elektr jelilerin qaıta jańǵyrtý jumystary júrip jatyr.
Buǵan deıin Altaı Kólginov qalada gazben jylytý qazandyqtary iske qosylatynyn habarlaǵan edi.
Odan bólek, bıyl elordada sorǵy-súzgi stansasy jumysyn bastaıtyny belgili boldy.