Nur-Sultandaǵy aqaýy bar úıdi jóndeýge ákimdikten 23 mln teńge bólindi
Bul týraly elordalyq qalalyq orta sapasy jáne baqylaý basqarmasy basshysynyń orynbasary Dáýlet Dosqulov aıtyp berdi.
«Ákimdiktiń tótenshe rezervinen bul úıdiń jobalyq-tehnıkalyq qujattamasyn ázirleýge 23 mln teńge bólindi. Onyń alǵashqy kezeńi – tehnıkalyq tekserý jumystary aıaqtalyp qaldy. Ári qaraı memlekettik saraptamadan ótý úshin jobalyq-smetalyq qujattama rásimdeledi. Bul qujattarsyz jumys isteý múmkin emes. Shamamen 1,5-2 aıda jobalyq-smetalyq qujattama daıyn bolady jáne taǵy bir aıda memlekettik saraptama júrgiziledi», - dedi D. Dosqulov qalalyq ákimdikte bergen suhbatynda.
Onyń aıtýynsha, balkony qısaıǵan páterdiń jáne tutas úıdiń jóndeý jumystary ákimdik rezervi esebinen júrgiziledi.
«Munyń barlyǵy rezerv aıasynda sheshiledi. Eger páter ıesi óz esebinen jóndeý júrgizgisi kelse, oǵan ruqsat beriledi. Al jalpy, bul – turǵyndardy zańsyz ornalastyrǵan úı salýshylardyń kinási», - dedi ákimdik ókili.
Eske sala ketsek, «Orbıta» turǵyn úı kesheni páterlerdiń birinde balkon ornynan «jyljyp» ketip, eden dirildegen. Qalalyq ákimdiktiń habarlaýynsha, olar problemaly turǵyn úı týraly biledi. Qazirgi ýaqytta ol jaqta tehnıkalyq tekserý júrgizilip jatyr, odan keıin úıdiń apattyq deńgeıi anyqtalady.
Ákimdiktiń habarlaýynsha, úı paıdalanýǵa berilmese de, úı salýshylar 6 jyl buryn turǵyndardy zańsyz ornalastyrǵan. Ondaǵy eń qaýipti nárse – úıdiń qasbeti jáne turǵyndardy evakýatsııalaýdyń qajeti joq.