Nur-Sultanda júrek donorlarynyń qurmetine art-nysan ashyldy
Jańa ınstallıatsııa Botanıkalyq baq aýmaǵynda ashyldy jáne ol «Syı» (Dar) dep atalady.
«Art-nysan jasaý ıdeıasyn maǵan «Júrek ortalyǵy» usyndy. Usynysty qýana qabyl aldym. Ózderińizge aıan júrek adamnyń basty aǵzasy. Birneshe eskız jasap usyndym, sonyń ishinen búgingi ashylyp jatqan ınstallıatsııany tańdap aldy. Art-nysan júrek formasynda trostan jasalǵan. Qyzyǵy sol, týyndyny árkim árqalaı qabyldap jatyr, bireý júrek formasynda dese, ekinshisi shamǵa uqsatyp jatyr», - dedi joba avtory Edýard Kazarıan.
Avtor atalǵan týyndyny jasaýǵa 6 aıǵa jýyq ýaqyt jumsaǵan.
«Elordamyzda adam ómirinde mańyzdy jaıttarǵa qatysty jańa dúnıeler paıda bolyp jatqanyna qýanyshtymyz. Maǵynasy tereń ári kerek joba dep oılaımyn. Adamǵa oı salady. Bir jaǵynan ómirdi baǵalaý kerektigin eske salsa, ekinshi jaǵynan donor bolý adamgershiliktiń belgisi ekeni kórsetip otyr. Ákimdik tarapynan osy sekildi qoǵam úshin mańyzdy jobalar men sharalardy qoldaýǵa árdaıym daıynbyz. Joba avtory men ony júzege asyrǵan jandarǵa alǵysymdy bildiremin», - dedi Nur-Sultan qalasy ákiminiń orynbasary Ashat Oralov.
Júrek donorlarynyń qurmetine qoıylǵan art-nysandy QR Ulttyq ǵylymı kardıohırýrgııa ortalyǵynyń bastamasymen «Júrek ortalyǵy» qory júzege asyryp otyr.
«Art-nysandy elorda tórinde ashý týraly ıdeıany bizdiń ujym kóterdi. Bul júrekterin donor etken jandar men olardyń jaqyndaryna degen qurmettiń belgisi. Óıtkeni, donor bolý ol júrektiń qalaýy jáne ońaı sheshim emes. Donor bolý – qaıyrymdylyq is, bul jerde paıda kórý degen sekildi jeke múdde kózdelmeýi tıis. Týyndy kórgen adamdar bile júrsin degen maqsatymyz da bar, óıtkeni júregin donor etken jandar ózge bireýdiń ómirin qutqardy», - deıdi QR Ulttyq ǵylymı kardıohırýrgııa ortalyǵynyń basqarma tóraǵasy ıÝrıı Pıa.