Nur-Sultanda Jeńis kúnine oraı 70-ke jýyq shara ótedi
«Bul jyl biz úshin erekshe. Jeńistiń 75 jyldyǵyn ótkizý – mańyzdy shara. Biz ekinshi dúnıejúzilik soǵystaǵy jeńistiń Qazaqstan úshin tarıhı mańyzy bar ekenin bilemiz. Óskeleń urpaqqa osy oqıǵany jetkizý qajet. Búgin Jeńistiń 75 jyldyǵyn merekeleý tujyrymdamasy daıyndaldy», - dedi qala ákiminiń orynbasary Baqtııar Máken.
Mereke aıasynda qalada 70-ke jýyq is-shara ótedi. Olardyń qatarynda 40 myń adamnyń qatysýymen «Jaýjúrek polk – Bessmertnyı polk» sherýi, elorda turǵyndary men qonaqtaryna Jeńis lentasyn taratý jáne basqa da sharalar bar.
«Elordada ardagerler uıymdary músheleriniń, belgili qoǵam qaıratkerleri men máslıhat depýtattarynyń qatysýymen Jeńistiń 75 jyldyǵyna arnalǵan is-sharalardy daıyndaý jáne ótkizý jónindegi komıssııa quryldy. Іs-sharalar kesheni soǵys ardagerleri men tyl eńbekkerlerine arnalǵan profılaktıkalyq medıtsınalyq tekserýden, qaıyrymdylyq jáne patrıottyq aktsııalardan turady. Naýryz aıynyń sońynda elordalyq soǵys ardagerleriniń fotosýretteri bar bılbordtar men bannerlerdi ornalastyrýǵa kirisemiz. Sondaı-aq ardagerler keńesimen birge qala ardagerleri týraly kitap shyǵarmaq oıymyz bar. Materıaldar jaqyn arada baspasóz quraldary úshin daıyn bolady», - dep atap ótti Qoǵamdyq damý isteri basqarmasynyń basshysy Talǵat Rahmanberdi.
Qoǵamdyq densaýlyq saqtaý basqarmasynyń aqparaty boıynsha, soǵys ardagerleri úıde keshendi medıtsınalyq tekserýden ótedi, sonyń ishinde olarǵa oftalmolog, kardıolog jáne basqa da mamandar keńes beredi. Sondaı-aq jalǵyz basty ardagerler men múgedekterge tegin dári-dármek jetkizý jalǵasady.
Astanalyq ardagerler keńesinde tyl ardagerleri úshin de medıtsınalyq tekserý uıymdastyrý usynyldy. Aıta ketsek, qalada osy sanattaǵy adamdar sany úsh myńǵa jýyq.
«Olardyń kópshiliginiń jasy 90-nyń mańaıynda, mundaı jasta jalpy kezekte turý qıyn. Keıde belgili bir sala mamandary jetispeı jatady. Olar úshin tyl ardagerlerine bekitilgen jerlerde, emhanalarda barý kestesin retke keltirý qajet», - dedi qalalyq Ardagerler keńesiniń tóraǵasy Sansyzbaı Esilov.
Osyǵan baılanysty Baqtııar Máken tyl ardagerlerin medıtsınalyq tekserýden tolyq qamtý úshin aktsııa uıymdastyrýdy tapsyrdy.⠀
Sondaı-aq, jıynda soǵys batyrlaryna arnalǵan eskertkishterdi qalpyna keltirý jáne olarǵa irgeles aýmaqty abattandyrý týraly aıtyldy. Qazirgi ýaqytta Nur-Sultanda 48 soǵys ardageri, olarǵa teńestirilgen 1 700-den astam adam jáne 3 myńǵa jýyq tyl eńbekkeri turady.