Nur-Sultanda jastardy nashaqorlyqqa tartatyn dárihanalar kóbeıgen
Jastardy nashaqorlyqqa tartatyn dárihanalardyń kóbeıýine baılanysty elordalyq Polıtsııa departamenti reıdtik is-sharalardy turaqty negizde ótkizip turady. Osyǵan qaramastan, josyqsyz farmatsevtter óz paıdasy úshin esirtkige táýeldi adamdar men jasóspirimderge qatty áser etetin medıtsınalyq preparattardy retseptsiz satýdy jalǵastyrýda. Máselen, elordalyq Esirtki qylmysyna qarsy is-qımyl basqarmasynyń qyzmetkerleri Jangeldın jáne Syǵanaq kósheleriniń boıyndaǵy dárihanalarda jedel aldyn alý is-sharalaryn júrgizgen kezde JK-nyń birine tıesili «dárilik preparatty dárigerdiń retseptisiz bosatý» faktileri qaıta qujattalǵan.
«JK ıesine qatysty ÁQBtK 426-babynyń 2-bóligi boıynsha ákimshilik is qozǵaldy. Sot qaýlysymen dárihanalardyń qyzmetin 6 aı merzimge toqtata turý túrindegi jaza taǵaıyndaldy. Osyǵan uqsas fakti Moldaǵulova kóshesindegi dárihanada anyqtaldy, onda sot sheshimi boıynsha 199 095 teńge somasynda aıyppul túrinde jaza taǵaıyndaldy», - dep jazdy vedomstvodan.
Jyl basynan beri polıtsııa qyzmetkerleri Medıtsınalyq jáne farmatsevtıkalyq baqylaý komıtetiniń Nur-Sultan qalasy boıynsha departamentimen birlesip ÁQBtK-niń 426-baby (Farmatsevtıkalyq qyzmet jáne dárilik zattar, medıtsınalyq maqsattaǵy buıymdar aınalysy salasynyń qaǵıdalaryn buzý) boıynsha 7 faktini anyqtady.
Eger sizge esirtki jáne psıhobelsendi zattardy saqtaý, ótkizý, dárilik preparattardy dárigerdiń, sondaı-aq olarǵa qatysy bar adamdardyń retseptisiz jiberý faktileri belgili bolsa, siz Nur-Sultan qalasy PD Esirtki qylmysyna qarsy is-qımyl basqarmasynyń anonımdi senim telefondaryna kúndizgi ýaqytta 71 63 93, táýlik boıy 32 22 22 nemese «102» arnasyna habarlaı alasyz.
Foto: polisia.kz