Nur-Sultanda vaktsına alǵandar arasynda eki bólmeli páter oınatylady

NUR-SULTAN. QazAqparat - Nur-Sultanda vaktsınatsııalanǵandar arasynda eki bólmeli páter oınatylady. Páter utysynyń oıynyna 25 maýsym men 31 tamyz aralyǵynda vaktsınanyń birinshi komponentin alǵan 18 jastan asqan qala turǵyndary qatysady, dep habarlaıdy QazAqparat ákimdiktiń resmı saıtyna silteme jasap.

Onyń qorytyndysy qyrkúıek aıynyń basynda jarııalanady. Utys oıynyna qatysý avtomatty túrde júrgiziledi, vaktsına alǵandarǵa qujat toltyrý talap etilmeıdi. Oǵan qaladaǵy kez kelgen vaktsınatsııa pýnktinde ekpe alǵandar qatysady.

Utys oıynynyń jeńimpazdaryn anyqtaý úshin Birge platformasynda arnaıy randomaızer servısi ornatylǵan, ol júlde ıelerin vaktsınatsııadan ótkenderdiń ID generatsııasymen tańdaıdy.

Ony ázirleýge IT-qaýymdastyq atsalysty. Bul servıs QR Densaýlyq saqtaý mınıstrliginiń aqparattyq júıesimen biriktirilgen.

Al MEGA Silk Way SOO vaktsınatsııa pýnktinde ekpe alǵandar arasynda avtomobıl utysy ótedi.

Sonymen qatar, Nur-Sultan qalasynyń ákimdigi apta saıyn tikeleı efırde iPhone12 jáne basqa da baǵaly syılyqtardyń utys oıynyn ótkizedi.

Baǵaly syılyqtyń bári demeýshiler esebinen oınatylady.

Utys oıyndary azamattardy vaktsına alýǵa yntalandyrý úshin ótkiziledi.

Sanıtarlyq normalar men vaktsınatsııa sizdiń densaýlyǵyńyzdy, aınalańyzdy jáne jaqyndaryńyzdyń densaýlyǵyn qorǵaýǵa múmkindik beredi.

Vaktsınatsııa arqyly ǵana ujymdyq ımmýnıtet qalyptasady.

Ujymdyq ımmýnıtet elorda men turǵyndaryn eshbir shekteýsiz, karantınge deıingi qalypty rejımge qaıta oralýǵa múmkindik beredi.