Nur-Sultanda «Úıdegi dáriger» jobasy qalaı júzege asyp jatyr

NUR-SULTAN. QazAqparat - 2018 jyldan bastap elordada «Úıdegi dáriger» BMSK mekemeleriniń jelisin damytý jobasy sátti júzege asyp jatyr. Bul qala turǵyndaryna qoljetimdi jerde bilikti medıtsınalyq kómek alýǵa, sondaı-aq qoldanystaǵy emhanalardyń júktemesin azaıtýǵa múmkindik beredi, dep habarlaıdy QazAqparat Nur-Sultan ákimdiginiń resmı saıtyna silteme jasap.

Halyqqa alǵashqy medıtsınalyq-sanıtarlyq kómekti jaqyndatý maqsatynda 2018-2020 jyldar aralyǵynda elordada qala turǵyndary úshin 20 mınýttyq qadamdyq qoljetimdilikti qamtamasyz etetin 30 «Úıdegi dáriger» nysany ashyldy.

Onyń 25-i jeke ınvestıtsııalardy tartý arqyly iske qosyldy. Alty nysan qalanyń shetinde ornalasqan.

2021 jyly qalada taǵy 10-ǵa jýyq nysandy ashý josparlanǵan, olardyń bir bóligi jumys istep tur:

1. «Salaýatty Astana» JShS (Qordaı kóshesi, 85, n. p. 32,8,7,6) (qyzmet etedi);

2. «Salaýatty Astana» JShS (Á. Bekturov kóshesi, 1/2, n. p. 10) (jumys isteıdi);

3. «Januıa» qazaqstandyq áleýmettik-medıtsınalyq kompanııasy JShS (Ánet baba k-si, 13) (jumys isteıdi);

4. «Januıa» qazaqstandyq áleýmettik-medıtsınalyq kompanııasy« JShS fılıaly (Baraev k-si, 13) (qyzmet etedi);

5. «ÓNEGE« otbasylyq densaýlyq jáne baqyt ortalyǵy JShS (Turan dańǵyly 7) (qyzmet etedi);

6. «ÓNEGE« otbasylyq densaýlyq jáne baqyt ortalyǵy» JShS (T.Júrgenov kóshesi, 18/2) (jóndeý jumystary júrgizilýde);

7. «Shıpager» otbasylyq densaýlyq ortalyǵy JShS (Álıhan Bókeıhan kóshesi, 6) (qyzmet etedi);

8. «Shıpager» otbasylyq densaýlyq ortalyǵy « JShS (Turan dańǵyly, 55) (jóndeý jumystary júrgizilýde);

9. «Shıpager» otbasylyq densaýlyq ortalyǵy JShS (Saýran kóshesi, 15) (jóndeý jumystary júrgizilýde);

10. Kırpıchnyı t.a. «Dostyq» PQJBO (jóndeý jumystary júrgizilýde).

«Úıdegi dáriger» nysandary negizinen turǵyn úılerdiń birinshi qabattarynda ornalasqan. Munda patsıentterge alǵashqy medıtsınalyq-sanıtarlyq kómek kórsetiledi, bul jaqyn mańdaǵy úılerdiń turǵyndaryn tirkeı alatyn emdeý-ambýlatorııalyq pýnktterdiń bir túri.

Máselen, Bókeıhan kóshesi, 21 meken-jaıy boıynsha ornalasqan «Amanat» otbasylyq densaýlyq ortalyǵyna búginde 14 myńǵa jýyq qala turǵyny tirkelgen.

Ótken jyly ortalyq óz jumysyn endi bastaǵan kezde, tirkelgenderdiń sany shamamen 9 myń patsıentti qurady.

Medıtsınalyq mekeme № 9 qalalyq emhana bazasynda jumys isteıdi.

«Úıdegi dáriger» jobasy aıasynda Uly Dala kóshesindegi úılerdiń turǵyndary bizden bilikti kómek ala alady. Ortalyqta ınfektsııalyq aýrýlarmen aýyratyn naýqastardy qabyldaýǵa arnalǵan súzgi-kabınet, skrınıngtik jáne EKG-kabınetter jumys isteıdi. Sondaı-aq, jalpy praktıka dárigerleri, akýsher-gınekologtar patsıentterdi qabyldaýdy júzege asyrady. Tegin medıtsınalyq kómektiń memlekettik kólemi aıasynda jeńildetilgen dári-dármek alýǵa arnalǵan dárihana bar. Egý kabınetinde balalar men eresekterge vaktsınatsııa júrgiziledi, zerthanalyq zertteýler úshin emshara kabıneti, qan alý kabıneti, kúndizgi statsıonar, ÝDZ-kabıneti jáne balanyń damý jáne ósý dınamıkasyn baqylaý úshin deni saý bala kabıneti jumys isteıdi», - dedi «Amanat» OKZ meńgerýshisi Aısulý Chýkaeva.

Ortalyqta mobıldi brıgada da uıymdastyrylǵan, ol COVID-19 bar patsıentterge de, densaýlyq jaǵdaıy boıynsha medıtsınalyq mekemege óz betinshe jete almaıtyndarǵa da barady.

«Bizdiń ortalyqta qazir 9 ýchaske jumys isteıdi. Ár dárigerge eń kóbi 1700 patsıent bekitilgen. Olar 4 saǵat boıy qabyldaý júrgizedi, taǵy 3 saǵat tikeleı saıtta jumys isteıdi. Mamandarǵa keńes alý úshin joldamamen patsıentterdi №9 emhanaǵa jiberemiz. Tańǵy saǵat 8-den 20.00-ge deıin jumys isteımiz, ádette bizde úlken kezekter joq. Bizdiń patsıentter ortalyqtyń jumysyna rıza jáne olar medıtsınalyq kómekti qol jetimdi jerde ala alady», - dep qosty otbasylyq densaýlyq ortalyǵynyń meńgerýshisi.
Ortalyqta qazir 40-qa jýyq adam jumys isteıdi. Turǵyndar medıtsınalyq mekeme týraly jáne «Úıdegi dáriger» sııaqty mańyzdy jáne áleýmettik mańyzy bar joba týraly oń pikir aıtady.