Nur-Sultanda ulttyq taǵamdar jármeńkesi ótti
Dostyq úıiniń kire berisinde ulttyq kıim kıgen jastar mártebeli qonaqtardy qarsy alyp, olardy «Analar amanaty» kórmesin tamashalaýǵa shaqyrdy.
Іs-sharaǵa Qazaqstan halqy Assambleıasy Tóraǵasynyń orynbasary - QR Prezıdenti Ákimshiligi Qazaqstan halqy Assambleıasy Hatshylyǵynyń meńgerýshisi Túımebaev Janseıit Qanseıituly, Nur-Sultan qalasy ákiminiń orynbasary Baqtııar Máken, Qazaqstan Respýblıkasyndaǵy shetel Elshilikteriniń ókilderi, Qazaqstan Respýblıkasy Parlament Májilisiniń depýtattary jáne birqatar memlekettik organnyń qyzmetkerleri, Qazaqstan halqy Assambleıasynyń músheleri, qoǵam qaıratkerleri, ǵylym jáne shyǵarmashylyq zııaly qaýym ókilderi, elordalyq QHA jastary men qala turǵyndary qatysty.
Dostyq úıiniń májilis zalynda ótkizilgen jıynda Nur-Sultan qalasy ákiminiń orynbasary Baqtııar Máken barshany ataýly merekemen quttyqtap, olarǵa yntymaq pen bereke-birlik tiledi. «Alǵys aıtý kúni barsha qazaqstandyqtardyń bir-birine degen meıirimdilik, dostyq pen súıispenshiliginiń jarqyn merekesi bolyp tabylady. Bul bizdiń ortaq elimizge, ózara kómek pen qoldaý kórsete otyryp, shynaıy birligimiz ben dostyǵymyzdy aıqyndaıtyn, ótken kúnimizdi eske alyp, jas urpaqqa úlgi bolatyn jarqyn merekelerdiń biri. Barlyqtaryńyzǵa otbasy baqyty men amandyǵyn tileımin», - dedi B.Máken.
Bıyl Qazaqstan halqy Assambleıasyna 25 jyl tolady. Osy merzimde aýqymdy jumystar atqarylyp, eldiń birligi men yntymaǵyn odan ári damytýǵa negiz qalandy. Elordamyzdaǵy Dostyq úıi búginde halyqaralyq dárejege tanylyp úlgerdi. Bul jerge atbasyn burǵan sheteldik kompanııa ókilderi elimizdegi mamandarmen bıznestik áriptestik ornatýǵa múddelestik tanytyp, ortaq isti birlesip talqylaǵan bolatyn. Munda mádenıet pen tarıhtyń, sporttyń damýyna da basymdyq beriledi. Byltyr osy jerden ashylǵan «Mámile» qazaq tili klýby arqyly óz erkimen qatysýshy árbir ultqa qazaq tilin aýyzsha jáne jazbasha meńgerýge qatysty arnaıy sabaqtar ótkizilýde.
Qazaqstan halqy Assambleıasy Tóraǵasynyń orynbasary - QR Prezıdenti Ákimshiligi Qazaqstan halqy Assambleıasy Hatshylyǵynyń meńgerýshisi Túımebaev Janseıit Qanseıituly óz sózinde jalpy Qazaqstan halqy Assambleıasynyń qurylý kezeńindegi 25 jyl ishinde atqarylǵan jumystarǵa keńinen toqtaldy: «Qazaqstanda halyq tamyryn baılanystyratyn jáne biriktiretin ulttyq kodtyń adamgershilik ımperatıvi retinde erekshe mánge ıe boldy. Búginde barlyq etnostardyń ókilderi elimizdiń ıgiligi úshin ekonomıkanyń barlyq salalarynda tabysty eńbek etip jatyr. Otanymyzdyń beıbitshiligi men kelisimin nyǵaıtýda, halyqtar arasyndaǵy myzǵymas dostyqtyń kópirin salýda. Qazaqstan etnostarynyń ózara túsinistigi men jemisti ózara is-qımylynyń kórneki úlgisi ǵylym, mádenıet, ádebıet jáne óner, sport salalary bolyp tabylady. Búgingi kúnge deıin Qazaqstan halqynyń tyǵyz mádenı baılanystary óz nátıjelerin berýde», - dep atap ótti J.Túımebaev.
Alǵys aıtý kúnine oraı arnaıy uıymdastyrylǵan dóńgelek ústel basynda quqyq qorǵaý organdarynyń qyzmetkerleri, jastar uıymdarynyń ókilderi sóz sóıledi. Olardyń qatarynda, elordalyq «TAŃ» tatar-bashqurt etnomádenı birlestiginiń tóraǵasy Sergeı Sadykov, «Jas sarbaz» áskerı-patrıottyq qozǵalysynyń jetekshisi Ashat Nalshybekov, Qaraǵandy qalasy «Psıhıkalyq damýy tejelgen balalarǵa arnalǵan mektep-ınternat» KMM dırektory Gúlnár Ahmetova jáne taǵy da basqa qatysýshylar boldy. Shyǵyp sóıleýshiler ózderiniń jetistikteri men tabysqa jetý qupııalary týraly málimdedi.
Іs-sharanyń kezekti bólimi elordalyq etnomádenı birlestikterdiń ókilderi daıyndaǵan túrli qolóner buıymdary, kartınalar, qýyrshaqtar, kádesyılar, ulttyq taǵamdar qoıylǵan qaıyrymdylyq jármeńkesimen jalǵasty.
Nur-Sultan qalasy «Radıma» belarýs etnomádenı ortalyǵynyń tóraǵasy, kompozıtor Dmıtrıı Ostankovıch elordalyq QHA tarıhynda buryn-sondy bolmaǵan, Alǵys aıtý kúnine arnaıy arnalǵan «Blagodarıý tebıa, moı Kazahstan!» ániniń tusaýyn kesti. «Bıyl elimiz úshin ataýly jyl bolǵandyqtan, etnomádenı birlestik atynan óz úlesimizdi qosýdy jón kórdik. Qazaqstan halqy Assambleıasynyń 25 jyldyǵy men Alǵys aıtý kúnine oraı jeke shyǵarmashylyǵymdaǵy kezekti ándi tartý etpekpin. Men úshin bul qurmet», - dep atap ótti D.Ostankovıch.
Kesh sońynda elordalyq QHA músheleri qaıyrymdylyq aktsııasynan jáne Dostyq úıi ǵımaratynyń ár buryshynda qoıylǵan arnaıy jáshikterden túsken barlyq qarajatty shuǵyl ota jasaýdy qajet etetin eki otbasyǵa tabystady.