Nur-Sultanda turmysy tómen 2 myńnan astam otbasyǵa azyq-túlik sebeti tabystalady

NUR-SULTAN. QazAqparat - Nur-Sultan qalasy ákimdiginiń bastamasymen «Igi ister marafony» aıasynda 8 naýryz merekesi qarsańynda halyqtyń áleýmettik osal toptaryna azyq-túlik sebetteri taratyla bastady, dep habarlaıdy elorda ákimdiginiń resmı saıty.

Elordada 6-9 naýryz aralyǵynda «Igi ister marafony» aıasynda 2 myńnan astam azyq-túlik sebetin taratý josparlanǵan. Ár otbasyǵa bir sebetten beriledi. Olardyń árqaısysynyń salmaǵy 25-27 keli. Іshinde jarma, makaron, kúnbaǵys maıy, kúrish, qaraqumyq, qant, shaı, un, túrli táttiler, balalarǵa arnalǵan kámpıtter, sol sııaqty kir jýǵysh untaq, sabyn, sýsabyn sekildi turmystyq hımııanyń 20-ǵa jýyq ónimi bar.

«Biz barlyq muqtaj azamattarǵa arnaıy tizim boıynsha azyq-túlik sebetterin tarata bastadyq. Olardyń qatarynda qarttar, I, II, III toptaǵy múgedekter, múgedek balalardy tárbıelep otyrǵan otbasylar, jalǵyz basty analar, kópbalaly otbasylar bar. Aktsııa aıasynda 6-9 naýryz aralyǵynda biz 2 myń otbasyǵa kómektesýdi josparlap otyrmyz. Mundaı sharalar kesheni naýryz aıynyń sońyna deıin jalǵasady. Al aıdyń sońyna deıin biz odan da kóp otbasyn qamtýdy josparlap otyrmyz. Bul sharaǵa túrli uıymdar demeýshilik etedi. Bul sebetterdi úılerge ákimdik qyzmetkerleri, partııa ókilderi, qarapaıym azamattar, eriktiler jetkizedi. Biz osy aktsııany qoldaýǵa, azyq-túlik sebetin qalyptastyrýǵa jáne ony muqtaj otbasylarǵa jetkizýge barlyq adamdardy shaqyramyz», – dedi elordanyń Іshki saıasat basqarmasynyń basshysy Dáýren Babamuratov.

«Nur Otan» partııasy elordalyq fılıaly tóraǵasynyń birinshi orynbasary Dáýlet Káribektiń aıtýynsha, kómek elordanyń barlyq tórt aýdanynda turatyn otbasylarǵa kórsetiledi.

Óz kezeginde merekelik sebet alǵan elorda turǵyny Irına Revýtskaıa alǵysyn bildirip, barlyq áıelderdi kele jatqan 8 naýryz merekesimen quttyqtady.

«Quttyqtap kelgenderińizge kóp rahmet. «Nur Otan» men ákimdik, men sizderdiń adamdarǵa kómektesip jatqandaryńyzǵa óte qýanyshtymyn. Árıne, odan da kóbirek kómek bolsa deımiz. Bizdi – áıelderdi, er adamdardy da eshkim umytpasyn. Áıelderdi 8 naýryz merekesimen quttyqtaımyn. Erler áıelderge kóbirek kóńil bólsin. Bári jaqsy bolsyn. Eń bastysy, bárine densaýlyq pen sáttilik tileımi!. Osylaı merekelerde kelip turasyzdar. Sizderge myń alǵys!», – dedi Irına Revýtskaıa.

Merekelik sebetke ıe bolǵan ózge turǵyndar da rızashylyqtaryn bildirip jatty. Búgin, ıaǵnı 6 naýryz kúni azyq-túlik sebetteri 1 myńnan astam otbasyǵa jetkizildi, ózgelerine jaqyn kúnderi taratylatyn bolady. Іs-shara barysynda sanıtarlyq normalar tolyqtaı saqtalady.