Nur-Sultanda shekarashylarǵa eskertkish ornatyldy
Eskertkish ashý bastamasyn «Zastava tarlandary» ardagerler birlestigi men QR UQK Shekara qyzmeti kótergen. Saltanatty sharaǵa QR UQK Shekara qyzmeti dırektorynyń birinshi orynbasary general-maıor Aıdar Aımýrzın, qala ákiminiń orynbasary Eset Baıken, QR Ulttyq qaýipsizdik komıteti Shekara qyzmetiniń ardagerleri keldi.
«Bul – kez kelgen ýaqytta bas qosa alatyn óte mańyzdy oryn. Eskertkish ornatýda únemi qarjylyq shyǵyndar jáne ýchaskeni bólý máselesi bolady. Munda Shekara qyzmetiniń áskerı qyzmetshileri men ardagerler óz múmkindikterine qaraı qarajat jınady. Sodan keıin Almaty aýdanynyń ákiminen jer telimin suradyq. Nátıjesinde B. Momyshuly, Abylaı han, Mustafın kósheleriniń qıylysynan jer telimin bóldi. Onyń da sımvoldyq máni bar», - dedi «Zastava tarlandary» respýblıkalyq ardagerler qoǵamdyq birlestiginiń tóraǵasy Tursyn Ýajanov.
Óz sózinde T. Ýajanov barlyq shekarashylardy Shekara qyzmetiniń 30 jyldyǵymen quttyqtady.
«Bul úlken mereke. Osy 30 jylda Shekara qyzmeti qaryshtap damydy. Qazirgi ýaqytta Shekara qyzmeti postkeńestik aýmaqtaǵy laıyqty qyzmetterdiń biri, kórshi memleketter men alys shetelderdiń barlyq shekara qyzmetterimen teń jaǵdaıda yntymaqtasady. Shekara qyzmeti úlken jetistikterge jetip keledi. Olarǵa densaýlyq, ashyq aspan tileımin, shekarashylar otanymyzdyń senimdi qorǵaýshysy bolyp, aǵa urpaqtyń dástúrin jalǵastyryp, jańa jetistikterge jete bersin», - deıdi Tursyn Ýajanov.
Aıta keteıik, 18 tamyz – el tynyshtyǵy úshin kúndiz túni kúzette turǵan shekarashylardyń kásibı merekesi. Onyń ústine bıyl QR Ulttyq qaýipsizdik komıteti Shekara qyzmetiniń qurylǵanyna 30 jyl tolyp otyr.