Nur-Sultanda shaǵyn jáne orta bıznes sýbektileriniń úlesi 3,1%-ǵa artty

NUR-SULTAN. QazAqparat - Aǵymdaǵy jyldyń 1 qańtaryndaǵy jaǵdaı boıynsha elordada 167 183 shaǵyn jáne orta bıznes sýbektisi tirkelgen. Onyń 68 483 zańdy tulǵa, 98 364 jeke kásipker jáne 336 sharýa qojalyǵy. Ótken jylmen salystyrǵanda ósim 3,1%-dy quraıdy, dep habarlaıdy qala ákimdiginiń resmı saıty.

Shaǵyn jáne orta kásipkerlik ókilderiniń turaqty ósýi memlekettiń kásipkerlik ortanyń jaı-kúıin jetildirý boıynsha qajetti jaǵdaılar jasaýynyń jáne qaladaǵy bıznes-ahýaldy jaqsartý boıynsha úzdiksiz jumys júrgizýiniń arqasynda múmkin boldy. Qazirgi ýaqytta elordada shaǵyn jáne orta bıznesti damytý men qoldaýǵa baǵyttalǵan birqatar baǵdarlamalar júzege asyrylýda.

Sonyń biri – «Bıznestiń jol kartasy-2020» bıznesti qoldaý men damytý baǵdarlamasy. Ol boıynsha ekinshi deńgeıdegi bankterde nesıeniń eń joǵary somasy 2,5 mlrd teńgege jetýi, kredıtterdiń paıyzdyq kórsetkishterin 40%-ǵa deıin sýbsıdııalaý, isin jańa bastaǵan kásipkerler úshin 85% - ǵa deıin jáne jumys istep júrgen kásipkerler úshin 50% - ǵa deıin kepil múlkin qamtamasyz etý maqsatynda kepildendirý, jańa bıznes-ıdeıalardy iske asyrý úshin 3 mln teńgege deıin mólsherde memlekettik grant berý, bıznes nysandarynyń ınfraqurylymyn jaqsartý jumystary iske asýda. Jumyspen nátıjeli qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» baǵdarlamasy da suranysqa ıe. Osy baǵdarlama aıasynda salalyq shekteýlersiz 5 jylǵa deıingi merzimge jyldyq 6% -ben 8 000 AEK-ke deıin shaǵyn nesıeler berý, sondaı-aq isin jańa bastaǵan kásipkerler úshin 85% - ǵa deıin jáne jumys istep júrgen bıznes ókilderi úshin 50% - ǵa deıin kepildik berý kózdelgen.