Nur-Sultanda saılaýdy beıpartııalyq baıqaý shtaby saılaý ýchaskelerin aralady

NUR-SULTAN. QazAqparat – Aldaǵy saılaýǵa qoǵamdyq monıtorıng júrgizý aıasynda Nur-Sultandaǵy saılaýdy beıpartııalyq baıqaý ortalyǵynyń ókilderi halyqaralyq baıqaýshy, TMD mıssııasy shtabynyń basshysy Evgenıı Kozıakpen birlesip, saılaý ýchaskelerin aralady, dep habarlaıdy QazAqparat tilshisi.

«Bizdiń mıssııamyz 21 jeltoqsannan bastap jumysqa kiristi. Shtab elordada ornalasqan. Biz óńirlerdegi saılaýǵa daıyndyq jumystarymen tanysamyz. Búgin Nur-Sultandaǵy birqatar saılaý ýchaskelerine barý múmkindigi týdy. Daýys berý bólmesinde qajetti nárseniń bári bar. Saılaýshylardyń, senimdi tulǵalar men baıqaýshylardyń qaýipsizdigi men qorǵalýy úshin qabyldanǵan epıdemııaǵa qarsy sharalarǵa nazar aýdarǵym keledi. Endi kabınada perdeler bolmaıdy, degenmen jasyryn daýys berý ádisi saqtalady. Menińshe, qaýipsizdik tolyǵymen qamtylǵan. Biz daýys berýge qatysatyn barlyq saıası partııalardyń saılaý shtabtarymen kezdesý ótkizdik», - deıdi E. Kozıak.

Onyń aıtýynsha, 20-ǵa jýyq dıplomatııalyq korpýs ókilderi uzaq merzimdi baıqaýshylar retinde tartyldy.

Saılaý kúni baıqaýshylardyń negizgi bóligi keledi. Qazir TMD Mıssııasy shtabynyń 200-den astam baıqaýshysy Ortalyq saılaý komıssııasynda akkredıttelgen.

Nur-Sultan boıynsha 240 saılaý ýchaskesinde 500 baıqaýshy saılaý barysyn baqylamaq.

«Biz barlyq ýchaskelerdi qamtyp otyrmyz. Barlyq baıqaýshylarymyz Baıqaýshy tártibi týraly Kodekspen tanysty. Bizde arnaıy jedel jeli bar. Ázirge elorda boıynsha ótinishter túsken joq, óńirlerden keıbir ýchaskelerde májbúrlep daýys berý faktileri týraly shaǵymdar tústi. Shtab mundaı jaǵdaılarǵa barynsha jaýap beredi. Beıpartııalyq baıqaý ortalyǵynan árbir ýchaskede eki baqylaýshy bolady», - dep túsindirdi Beıpartııalyq baıqaý ortalyǵynyń qalalyq shtab basshysy Tólegen Kúnádilov.