Nur-Sultanda otbasyǵa áleýmettik-psıhologııalyq qoldaý kórsetý ortalyǵy ashyldy

NUR-SULTAN. QazAqparat – Elordada ómirde qıyn jaǵdaıǵa tap bolǵan otbasylarǵa áleýmettik-psıhologııalyq qoldaý kórsetý qyzmeti iske qosyldy, dep habarlaıdy QazAqparat tilshisi.

«Ortalyq mamandary qoldaý kerek otbasylarǵa bastan-aıaq kómek kórsetedi. Eger otbasy esepte turǵan bolsa, sol otbasyǵa esepten shyǵam degenshe qoldaý bolady. Jáne jumys jan-jaqty júredi. Ol degenimiz densaýlyq saqtaý, eńbekpen qamtý, quqyq qorǵaý organdary mamandary birlesip jumys isteıdi. Máseleni birge sheshedi. Bul jerde otbasyny áleýmettendirý, psıhologııalyq qoldaý jáne zań jaǵynan keńes beriledi», - dedi Nur-Sultan qalasy bilim basqarmasy basshysynyń orynbasary Rımma Imanǵazınova.

Onyń aıtýynsha, qoldaý qajet degen otbasynyń bárine birdeı kórsetiledi.

«Adam ómirden qajyǵan sátte, oǵan emıtsıonaldy turǵydan qoldaý óte qajet. Bizge kez kelgen adam óz máselesimen kelgen sátte aldymen máseleniń mán-jaıyn bilýge tyrysamyz. Ár adamnyń taǵdyrlyq jaǵdaıy men máselesi ártúrli. Biz psıholog retinde sol máseleni anyqtap, onyń sheshý jolyn sol kisimen birge qarastyramyz. Sondaı-aq, keıbir máseleni kisimen jeke talqylaý qajet bolady, al keıbir jaıttyń astaryn tabý úshin ortaǵa salǵan durys. Jalpy otbasylyq kıkiljińge jıi alyp keletin jaıt, ózara túsinispeýshilik pen ortaq sheshimge kele almaý. Nemese ata-ana men bala ortaq til tabysa almaı jatady. Osy tusta olarǵa psıhologııalyq qoldaý kerek», - deıdi psıholog Svetlana Tretıakova.

Sondaı-aq, jańadan ashylǵan ortalyqta balalarǵa arnalǵan oıyn alańy bar jáne áleýmettik qyzmetker qyzmeti de usynylady.