Nur-Sultanda Naýryz merekesin toılaý máseleleri talqylanyp jatyr
Sharaǵa Qazaqstan, Túrkııa jáne Iran ǵalymdary men sarapshylary jáne dıplomattar qatysyp jatyr.
«Kóne zamannan bastaý alatyn osynaý meıram jańarý men jańa ómirdiń bastalý sátin sıpattaıdy. Naýryz – rýhanı baı muramyzdyń, biregeı ulttyq kodymyz ben úzdiksiz urpaq sabaqtastyǵynyń jarqyn nyshany. Bul mereke ómirimizge jasampazdyq pen damýdyń jańa lebin ákeledi. Búginde Naýryz – álemde de, Túrki dúnıesinde de, Qazaqstan Respýblıkasynda da dostyqty, ózara qurmet pen kelisimdi nyǵaıtýǵa sebepshi jalpyhalyqtyq meıram», - dedi Eýrazııa ulttyq ýnıversıtetiniń rektory Erlan Sydyqov.
Óz sózinde rektor Qazaqstan Respýblıkasynyń jańarý men jańǵyrýǵa baǵyt túzegenin atap ótti.
«Baıqap qarasańyzdar, Naýryzdyń fılosofııasynda da osy kontseptsııa bar. Búgingi konferentsııanyń maqsaty – Qazaqstanda 1988 jyldan beri resmı merekelenip kele jatqan Naýryzdyń mánin, 34 jyl ishindegi toılaný ereksheligin, sharany ótkizýdegi kemshilikterdi, osy máselege qatysty jańartý jumystaryn júrgizýdiń ǵylymı jáne tájirıbelik negizdemelerin zerdeleý. Sol úshin de Naýryzdyń otany sanalatyn Iran Islam Respýblıkasy mamandaryn, ózimizben qanattas Túrkimenstan, Tájikstan mamandaryn, osy meıramdy sońǵy jyldary atap óte bastaǵan Túrkııa ǵalymdary men Naýryzdy ıÝNESKO deńgeıine kóterýge sebepshi uıymdardyń azamattaryn shaqyrdyq.
Sózimniń sońynda aıtarym: Naýryz – irgesi sógilmes birliktiń berekesi, yrysy tógilmes tirliktiń merekesi. Jaqsylyqtyń jarshysy, jańa jyldyń bastaýy – Naýryz meıramy týǵan jer topyraǵyna qut-bereke ákelsin! Elimiz tynysh, týǵan jerimiz aman bolyp, árbir jańa kún ár otbasyna shat kóńil, baqyt jáne bereke syılasyn!» - dedi E. Sydyqov.