Nur-Sultanda nan baǵasy qymbattaı ma
Astanalyq ınvestıtsııa jáne kásipkerlikti damytý basqarmasynyń málimetine sensek, jyl basynan beri astyq pen un baǵasy óskeni baıqalady. Saldarynan birinshi sort unynan pisirilgen áleýmettik nan baǵasynyń ósý qaýpi týyndap otyr.
«Bıylǵy sáýirde baǵany turaqtandyrý úshin kelisin 94 teńgeden 2000 tonna birinshi sort un satyp alyndy. Ony otandyq óndirýshi «Tabys 2009» JShS-nen satyp aldyq. Bul un qaladaǵy eki iri naýbaıhanaǵa (qala naryǵyndaǵy úlesi – 30%) bólinip berildi. Olardyń bir aıdaǵy qajettiligi - 750 tonna», - dep málim etti vedomstvo.
Basqarmanyń málimetinshe, qala naýbaıhanalarymen kelisim boıynsha bıylǵy 1 jeltoqsanǵa sheıin nan baǵasy sol bir bólke – 75 teńge kúıinde qalady. Dúkende 80-85 teńgeden satylady. Búginde erkin naryqtaǵy astyqtyń baǵasy tonnasyna 80 myń teńgeden asady.
Aıta keteıik, «Azyq-túlik kelisimshart korporatsııasy» UK» AQ astyqty sapasyna qaraı tonnasyn 70 myń teńgeden satyp alatynyn habarlaǵan bolatyn.
«Osyǵan baılanysty nan baǵasynyń kenetten kóterilip ketýine jol bermes úshin komıssııa sheshimimen turaqtandyrý qoryna 6 myń tonna un satyp alý josparlanyp otyr. Ol jańa egin naýqanyna deıin baǵany turaqty qalypta ustap turady jáne qaladaǵy qajettiktiń 65 paıyzyn qamtamasyz etedi», - dep málimdedi basqarma.
Ákimdik atalǵan baǵyttaǵy jumys baqylaýda ekenin atap ótti.
Eske sala ketsek, 14 qazandaǵy Úkimet otyrysynda Aýyl sharýashylyǵy mınıstri Saparhan Omarov nan baǵasy qanshalyqty qymbattaıtynyna qatysty óz boljamyn aıtqan edi. Odan keıin mınıstrlik ókilderi áleýmettik nannyń baǵasy ózgermeıdi dep sendirgen bolatyn.