Nur-Sultanda mereke kúni 77 sábı dúnıe esigin ashty
Esil, Almaty aýdany ákimdikteri jáne qalalyq qoǵamdyq densaýlyq saqtaý basqarmasynyń atynan ákimniń áıelder isteri jáne demografııalyq saıasat jónindegi bas ınspektory S.Bısembaeva sábıler men olardyń analaryna quttyqtaý hat pen gúl shoǵyn tabystap, zor densaýlyq tiledi.
«Sizderdi búgin aıtýly kúnmen quttyqtaımyn! Nárestelerińizdiń deni saý bolyp, sizderdi qýanyshqa bóleıtin, elge qyzmet etetin azamat bolyp óssin. Biz sizderdi elorda kúnimen quttyqtaý úshin arnaıy keldik. El azamattary jyl sanap kóbeıe bersin» — dedi S.Bısembaeva.
Sáýle Bısembaeva akýsherlik blokqa KVI-men aýyryp túsken analardy da quttyqtady. Munda deni saý 5 bala ómirge keldi: 4 ul jáne bir qyz.
«Dárigerler belgilegen ýaqytqa súıensek, sál keıinirek bosanýym kerek edi. Alaıda, balam dál osy kúni ómirge kelýdi tańdaǵan eken. Bul beker emes, munda bir syr bar dep oılaımyn», — deıdi jańa bosanǵan analardyń biri.
Elorda kúninde bosanǵan analarǵa estelik syılyqtar men sábıge arnalǵan kerek-jaraq berildi.
Keshe, ıaǵnı 6 shilde kúni elordada 77 bala ómirge keldi, onyń ishinde 37 ul jáne 40 qyz bala.