Nur-Sultanda mas kúıde kólik júrgizgen boıjetken 15 táýlikke qamaldy

NUR-SULTAN. QazAqparat – Nur-Sultanda mas kúıde rýlge otyrǵan boıjetken 15 táýlikke qamaldy. Sondaı-aq ol 7 jyl boıy kólik júrgizý quqyǵynan aıyryldy, dep habarlaıdy QazAqparat tilshisi.

«Tańerteń Petrov kóshesinde patrýldik polıtsııa qyzmetkerleri «Hyundai Greta» kóligin toqtatty. Tekserý barysynda polıtsııa qyzmetkerleri rýlde bolǵan19 jastaǵy boıjetkennen alkogoldiń ıisi shyǵyp turǵanyn sezgen. Jol saqshylary ony kólik tizgininen shettetip, bekitilgen erejege sáıkes, medıtsınalyq kýálandyrýdan ótý týraly usynǵan», - dedi P olıtsııa departamentiniń baspasóz qyzmetinen.

Medıtsınalyq kýálandyrýǵa sáıkes, júrgizýshi kólikti jeńil dárejedegi mas kúıde júrgizgeni anyqtaldy. Avtoledıge qatysty Ákimshilik kodekstiń 608-baby 1-bóligi boıynsha ákimshilik is qozǵalyp, onyń kóligi kommýnaldyq turaqqa qoıyldy. Ákimshilik sottyń sheshimi boıynsha boıjetken 15 táýlikke qamalyp, 7 jyl boıy kólik júrgizý quqyǵynan aıyryldy.

Keıingi eki kúnniń ishinde polıtsııa qyzmetkerleri elordada 23 júrgizýshiniń mas kúıde ustalǵanyn habarlaıdy.