Nur-Sultanda kópbalaly analar kórpe kórmesin ótkizdi
«Kórpe Fest» degen atpen uıymdastyrylǵan festıvalge Nur-Sultan qalasynan bólek, Almaty, Aqmola, Atyraý, Qaraǵandy, Pavlodar oblystarynan kelgen kópbalaly analar shaqyrylypty. Tanymal etno-dızaıner Yrza Tursynzadanyń bul bastamasyna QR eńbek jáne halyqty áleýmettik qorǵaý mınıstrligi men Nur-Sultan qalasynyń ákimdigi qoldaý bildirgen. «Altyn sapa» syılyǵynyń ıegeri, «Altyn orda» ulttyq buıymdar brendiniń avtory Yrza Tursynzada 3 kúnniń ishinde 80-nen astam kópbalaly anaǵa kórpe tigip, tystaýdyń túrli tásilderin úıretip, kásip dóńgeletýge baýlyǵan.
«Osydan 10 jyl buryn Máskeýden otanyma oraldym. Elge degen saǵynysh bolsa kerek, kele salyp osy qolónerge bet burdym. Keıin ol bızneske aınalyp, bir kórpeniń ózin kem degende 2000 dollarǵa satatyndaı deńgeıge jettim. Endi sol kásiptiń qyr-syryn kópbalaly analarǵa úıretip jatyrmyn. Jalpy, Qazaqstanda menen tálim alǵan 5000-nan astam qyz-kelinshek bar. Negizgi maqsat - qazaqtyń analaryn qara shańyraqqa qaıtarý. Sán salonyn ashqannan ulttyq qolónermen aınalysqan áldeqaıda baıandy. Ulttyq qolóner úıdiń ishki kórinisimen qosa, áıeldiń óz bolmysyn da túzeıdi. Al ondaı otanasy bar úı qazaqtyqtan alshaq ketpıdi», - deıdi etno-dızaıner.
Áleýmettik jeli arqyly Yrza Tursynzadanyń sheberligine qanyq analar festıvalge óz qolynan shyqqan týyndylaryn ala kelipti. Kórpeniń túr-túri «Kórme» zalynyń ishin qazaqı aýraǵa bólegen. Kórpeler kórmesiniń ashylýyna QR eńbek jáne halyqty áleýmettik qorǵaý mınıstri Berdibek Saparbaev pen Nur-Sultan qalasynyń ákimi Altaı Kólginov qatysyp, kópbalaly analardy astana kúnimen quttyqtady.
Ulttyq qolónerdi kásipke aınaldyrǵysy keletin kópbalaly analarǵa Berdibek Saparbaev «Eńbek» baǵdarlamasy arqyly jańa kásip ashý úshin 505 myń teńge kóleminde grant alýǵa bolatynyn jetkizdi.
Al elorda ákimi Altaı Kólginov bıyl eldi baspanamen qamtý maqsatynda 1,5 myń sertıfıkat qarastyrylǵanyn, onyń myńy az qamtylǵan otbasylarǵa beriletinin atady.
Úsh kúndik semınarda ismerlikke ıkemdilik tanytyp, belsendi qatysqan 50 kópbalaly anaǵa tigin mashınalary tabystaldy. Festıvalge qatysýshy ózge analar bolsa, tigin negizderin meńgergeni týraly sertıfıkattarǵa ıe boldy.