Nur-Sultanda karantın kezinde túngi klýbta 400 adam bolǵan

NUR-SULTAN. QazAqparat - Elordada monıtorıngtik toptar kúsheıtilgen jumys rejımine kóshirildi. Karantındik shekteýlerdiń buzylýyn anyqtaý jáne boldyrmaý úshin reıdter elordanyń barlyq aýdanynda ótkiziledi, dep habarlaıdy QazAqparat qala ákimdiginiń resmı saıtyna silteme jasap.

13 naýryzǵa qaraǵan túni monıtorıng toby «BHB» barynda jumys rejıminiń buzylýyn anyqtady. Tún ortasynan keıin mekemede 400-ge jýyq adam bolǵan.

Oqıǵa ornyna saǵat 00.19-da kelgen monıtorıngtik top «BHB» barynyń jumys rejımi týraly elordanyń sanıtarlyq dárigeriniń qaýlysynyń talaptaryn buzyp, jumysyn jalǵastyryp jatqanyn anyqtady. Sonymen qatar, mekemede bir ýaqytta áleýmettik qashyqtyq pen maska rejımin saqtamaǵan 400-ge jýyq kelýshi boldy. Jınalǵan materıal kásipkerlik sýbektisin jaýapkershilikke tartý úshin tıisti organdarǵa berildi.

Aıta keteıik, 2021 jyldyń 1 qańtarynan bastap elordanyń sanıtarlyq-epıdemıologııalyq baqylaý basqarmasyna 287 shuǵyl habarlama kelip tústi. Olardyń negizinde kásipkerlik sýbektilerine karantındik shekteýlerdi buzý isine qatysty jospardan tys 280 tekserý júrgizildi.
Olardyń qorytyndysy boıynsha 60,5 mln teńgeden astam somaǵa 261 jeke jáne zańdy tulǵa ákimshilik jaýapkershilikke tartyldy.

Sanıtarlyq-epıdemıologııalyq tekserý qyzmetkerleri mamandandyrylǵan aýdanaralyq ákimshilik sotqa buzýshylyqtardy joıý týraly nusqamany oryndamaıtyn 47 «qasaqana buzýshyǵa» qatysty 54 materıal jiberdi.

Sot obektilerdiń qyzmetin toqtatý týraly 28 jeke jáne zańdy tulǵaǵa qatysty ákimshilik sharalar qabyldady.

Búgingi tańda 13 kásipkerlik nysanynyń qyzmeti toqtatyldy. Olar: «Teukila» karaoke-bar, «ZOLOTO» meıramhanasy, «Stories» (qazirgi ýaqytta «Dva grýzına») laýndj-bary, «Abba» laýndj-bary, «Alanııa» túngi klýby, «Echo» laýndj-bary, «Janym sol» karaoke-bary, «Echo» laýndj-bary, «Kango» batýt ortalyǵy, «Ginza» restoran-karaoke, «Alanya» restoran-karaoke, «Nirvana» bar, «Loto-klýb».

Alaıda QR zańnamasynyń talaptaryn qasaqana elemeý jáne kásipkerlik sýbektileri nysandarynyń qyzmetin jáne jumys rejımin toqtatý týraly sot jáne sot oryndaýshylarynyń qaýlylaryn oryndamaý faktileri bar ekenin atap ótken jón.

Osylaısha «Alanııa» túngi klýby sot oryndaýshysynyń kirý esikterin mórlep, sýmen jabdyqtaýdy óshirgenine qaramastan, 2021 jylǵy 7 naýryzda sýmen jabdyqtaýǵa jekeleı qosylyp, jumysyn jalǵastyrdy.

Monıtorıngtik top «Tekuila» karaoke-bary sot qaýlysyn buzdy dep aıyptady. Mekeme ıeleri sot oryndaýshysy salǵan plombalardy úsh ret jyrtyp, sýmen jabdyqtaýdy derbes qosqan.

«Echo» laýndj-bary da plombany julyp alyp, jumysyn jalǵastyrdy. Zań buzý faktisi 2021 jyldyń 6 naýryzynda anyqtaldy.

Óz kezeginde «Nirvana» bary da plombanyń buzylýyna jáne jumystyń zańsyz qaıta jandanǵanyna baılanysty aıyptaldy.

Kásipkerlik sýbektileri tarapynan oryn alǵan qasaqana buzýshylyq faktileri týraly hattar QR zańnamasyn buzýshylardy jaýapkershilikke tartý boıynsha pármendi sharalar qabyldaý úshin Ádilet departamentine, qalalyq prokýratýraǵa joldandy.

2021 jylǵy 10 naýryzda sot qaýlylarynyń oryndalmaýyna baılanysty aǵa sot oryndaýshysy «Tekuila» kafe-bary men «Alanya» karaoke-meıramhanasyn sýmen jabdyqtaýdan jáne elektr qýatynan ajyratýdy júrgizdi.

Esterińizge sala keteıik, 10 naýryzdan bastap Nur-Sultan qalasy epıdemıologııalyq jaǵdaı boıynsha «qyzyl aımaqqa» endi. Karantındik shekteýlerdi buzýshylyqtardy anyqtaý jáne boldyrmaý boıynsha monıtorıngtik toptardyń jumysy kúsheıtilgen rejımge aýystyryldy.