Nur-Sultanda qalalyq týrızm boıynsha jahandyq sammıt ótedi

NUR-SULTAN. QazAqparat - Qala ákimi Baqyt Sultanov Portýgalııa astanasy Lıssabonda ótken UNWTO-ǵa múshe elder qalalarynyń basshylary men týrızm mınıstrleriniń forýmynda Nur-Sultan qalasyn dúnıejúzilik týrıstik uıymnyń qalalyq týrızm boıynsha 8-shi jahandyq sammıtin ótkizý orny retinde tanystyrdy. Bul jaıynda shahar basshysy Feısbýktegi paraqshasynda jazdy, dep habarlaıdy QazAqparat.

Shahar basshysy aldymen Nur-Sultan qalasynyń halyqaralyq deńgeıdegi is-sharalardy ótkizýge arnalǵan barlyq qajetti ınfraqurylymǵa ıe ekenin atap ótti.

«Seýl, Kýala-Lýmpýr, Barselona, Máskeý, Ystanbul syndy tamasha qalalardan osyndaı mańyzdy sammıttiń estafetasyn qabyldaý jáne Nur-Sultan qalasynda osyndaı aıtýly is-sharany uıymdastyrý biz úshin úlken qurmet. Ótken jyly elordamyzdyń 20 jyldyǵy atalyp ótti. Qala halqy 3 esege ósip, elordamyz 100-ge jýyq ult ókilderiniń ortaq shańyraǵyna aınaldy. Nur-Sultan - ıÝNESKO-nyń «Álem qalasy» syılyǵynyń ıegeri. Osynyń barlyǵy QR Tuńǵysh Prezıdenti - Nursultan Ábishuly Nazarbaevtyń jan-jaqty qoldaýynyń arqasynda múmkin boldy. Elbasynyń elimiz men bizdiń qalamyzdyń damýyna qosqan orasan zor eńbegi eskerile kele, elimizdiń elordasy onyń esimimen atalyp, Nur-Sultan qalasy bolyp ózgertildi», - dedi ol.

Forým aıasynda Baqyt Sultanov pen UNWTO-nyń bas hatshysy Zýrab Pololıkashvılı «Aqyldy qalalar, aqyldy baǵyttar» taqyrybynda UNWTO-nyń qalalyq týrızm boıynsha 8-shi jahandyq sammıtin ótkizý jónindegi kelisimge qol qoıdy.

«Nur-Sultan - búgingi tańda álemniń eń jas jáne qarqyndy damyp kele jatqan astanalarynyń biri. Ol óziniń qaıtalanbas sáýleti jáne biregeıligimen, zamanaýı ınfraqurylymy bar nysandarymen Ortalyq Azııanyń iskerlik ári oqıǵaly habyna aınaldy. Eger 20 jyl buryn 3 qonaq úı bolsa, qazir olardyń sany 231-ge jetti. Onyń ishinde tanymal, álemdik jelilerdiń de nysandary bar», - dedi ákim.

Osy jyldyń 7-11 qazany kúnderi ótetin sammıtte, sondaı-aq kongresster men konferentsııalardyń halyqaralyq qaýymdastyǵynyń (ICCA) uıymdastyrýymen iskerlik týrızm ındýstrııasy (MICE) boıynsha sheberlik synyby ótkiziletin bolady.

Uıymdastyrýshylardyń aıtýynsha, atalǵan sammıtti ótkizý - qalany Ortalyq Azııanyń jańa týrızm ortalyǵy retinde pash etý, qalany damytýdaǵy jańa baǵyttardy kórsetý, iri halyqaralyq qaýymdastyqtar jáne kompanııalarmen yntymaqtastyqty nyǵaıtýdyń zor múmkindigi.

Óz kezeginde UNWTO bas hatshysy Zýrab Pololıkashvılı týrızmniń qala bolashaǵy damýynyń ajyramas bóligi ekendigin aıtyp ótti.

«Qazir de, bolashaqta da qala týrızmi óz mańyzdylyǵyn joımaıdy. Týrızmdi qalalardyń turaqty bolashaǵynyń ajyramas bóligi retinde qalyptastyrý maqsatynda úlken múmkindikter usyna otyryp, Qalalyq týrızm boıynsha UNWTO-nyń VIII jahandyq sammıtiniń Nur-Sultan qalasynda ótetindigine qýanyshty ekenimizdi aıtqym keledi», - dedi Z. Pololıkashvılı.

Aıta keteıik, UNWTO - dúnıejúzilik týrıstik uıym, BUU júıesiniń mekemesi. Onyń quramyna 158 el, 6 qaýymdastyrylǵan jáne 500-den astam affılıırlengen múshe engen. Uıym qyzmetiniń negizgi maqsaty - týrızm salasynyń jalpyǵa qoljetimdi jáne turaqty damýyn qamtamasyz etý. Uıymnyń shtab-páteri Ispanııanyń Madrıd qalasynda ornalasqan.