Nur-Sultanda indet órship tur: Qala ákimdigi úndeý jasady

NUR-SULTAN. QazAqparat - Nur-Sultan qalasynyń ákimdigi turǵyndardy karantındik sharalardy saqtaýǵa shaqyrdy, dep habarlaıdy QazAqparat.

Málim etilgendeı, sońǵy aptada elordada syrqattanýshylyq deńgeıi aldyńǵy aptadan 76% joǵary boldy. ıAǵnı 100 myń turǵynǵa shaqqandaǵy qarqyndy kórsetkish 106,96 qurady. Reprodýktıvtik sany — 1,506.

Naýqastar sanynyń artýyna baılanysty elorda 10 naýryzdan bastap epıdemıologııalyq jaǵdaı boıynsha «qyzyl aımaqqa» endi.

Nur-Sultan qalasynda 22 naýryzdaǵy jaǵdaı boıynsha, COVID-19 ınfektsııasynyń barlyǵy 28 248 jaǵdaıy tirkeldi, onyń ishinde 17 947 — sımptomdy jáne 10301 —sımptomsyz.

Bir táýlikte zerthanada rastalǵan 203 jaǵdaı tirkeldi: sımptomdy - 136, sımptomsyz – 67 jaǵdaı. Ósim — 0,85%.

Tirkelgen 136 sımptomdyq jaǵdaıdyń 39-y baılanysta bolǵan adamdar arasynda anyqtaldy, 97-si — óz betimen tekserilgen.

22 naýryz kúni 67 sımptomsyz jaǵdaı anyqtaldy, onyń ishinde baılanysta bolǵan adamdar arasynda — 53. Bir táýlik ishinde 14 jasqa deıingi balalar arasynda 39 oqıǵa tirkeldi.

Budan bólek, naýqastarmen baılanysta bolǵan 357 adam tizimge alyndy. Іndet órship turǵan oshaqtardyń jalpy sany – 1321, onyń ishinde úıdegi oshaqtar – 834 (baılanysta bolǵandar sany — 1497), mekemeler sany – 487 (ujymdarda baılanysta bolǵandar — 1917).

Osy rette Nur-Sultan qalasynyń Sanıtarııalyq-epıdemıologııalyq baqylaý departamenti karantındik sharalardy qatań saqtaýdy usynady:

- maska rejımin ustaný;

- adam kóp jınalatyn oryndarǵa barmaý (estelik is-sharalar, týǵan kúnder, mereıtoılar, shyǵaryp salý, qudalyq, úılený toılary, betashar jáne basqa da is-sharalar);

- áleýmettik qashyqtyqty saqtaý;

- qoldy sabynmen jıi jýý nemese antıseptıkpen zararsyzdandyrý.

«Koronavırýs ınfektsııasy boıynsha epıdemıologııalyq jaǵdaıdy eskere otyryp, óz densaýlyǵyńyzǵa jáne jaqyndaryńyzdyń densaýlyǵyna jaýapkershilikpen qaraýdy suraımyz!», - dedi qala ákimdiginen.