Nur-Sultanda ımamdar jetkilikti me – Bas múftıdiń jaýaby

NUR-SULTAN. QazAqparat – Qazaqstan musylmandary Dinı basqarmasynyń tóraǵasy, bas múftı Serikbaı qajynyń aıtýynsha, elordada qazir 12 meshit jumys istep tur. Barlyǵynyń esigi aıqara ashyq. Eń bilikti teolog-mamandar elordada jumys isteıdi, dep habarlaıdy QazAqparat tilshisi.

«Elordada qazir 12 meshit jumys istep tur. Qazaqstan musylmandarynyń qarashańyraǵy – Dinı basqarma da Nur-Sultan qalasynda ornalasqan. Sondyqtan, dinı kadrlar, mamandar jetpeıdi degen pikir jańsaq. Ondaı jaǵdaı joq. Men qyzmetke alyp, soǵan buıryq berip, qyzmetke taǵaıyndaıtyn adammyn. Kadr máselesine kúndelikti saraptaý, taldaý jumystaryn júrgizip otyramyn», - dedi Bas múftı Qazaqstan Dintanýshylarynyń HІ forýmynan keıin QazAqparat tilshisiniń suraǵyna jaýap bere otyryp.

Serikbaı qajy Orazdyń aıtýynsha, elordada qazirgi tańda 50-den astam ımam bar.

«Ýaǵyz, janazaǵa barý – onyń bárine ımamdar úlgerip júr. Imam, naıb ımam, dinı qyzmet atqaratyn moldalar, azanshy, ustaz syndy barlyq qyzmetkerlerimiz osy jerde jetedi. Jalpy, el aýmaǵynda dinı kadrlar tapshylyǵynan aryldyq. Men bir teris jańsaq pikir estip júrmin. Bireýler elimiz boıynsha dinı qyzmetkerlerdiń joǵary biliminiń paıyzdyq kórsetkishi 25-30 paıyz aralyǵynda ekenin aıtady. Al, jaraıdy. Oǵan keliseıik. Al aýyldaǵy ımam ıakı moldaǵa sende joǵary bilim bolýy kerek degen talapty qalaı qoıa alamyz? Ony qoıa turyp, «Dıplommen aýylǵa» baǵdarlamasy aıasynda biliktiligi joǵary dárigerlerdi aýylǵa jiberip úlgerdik pe? Úlgere almaı jatyrmyz. Olaı bolsa, joǵary bilimdi, biraq jalaqy almaıtyn adam anaý shalǵaıdaǵy aýylǵa qalaı barady?» - deıdi ol.

Bas múftıdiń sózine qulaq assaq, elimizde 2 myńnan asa meshit bolsa, sonyń barlyǵynda azanshy bar.

«Azanshy bes ýaqyt azanyn aıtady da, ketedi. Ýaǵyz da, nasıhat ta aıtpaıdy, basqa jumys atqarmaıdy. Ol úshin joǵary bilim kerek pe? 4-5 jyl joǵary bilim alǵan azamat meshitke baryp azanshy bola ma? Azan aıtý úshin jaqsy áýeni, daýysy, maqamy jáne Qurandy jaqsy jetkize biletin daǵdysy ǵana jetedi. Olar úshin medrese de daıyndap jatyrmyz. Sondyqtan, biliktilik talaptaryn bas ımam men onyń orynbasarlaryna ǵana qoıyp otyrmyz. Olaı bolsa, osyndaı kórsetkishpen qaraıtyn bolsa, árıne, bizdiń dinı qyzmetkerlerdiń biliminiń paıyzdyq kórsetkishi 70 paıyzdan asyp ketedi. Imamdardyń ishinde 150-ge tarta magıstr bar. Sol úshin ananyń nemese mynanyń bilimi joq dep jalpylama baǵa berýge bolmaıdy», - dedi Bas múftı.

Eske sala ketsek, elordada Qazaqstan Dintanýshylarynyń HІ forýmy ótip jatyr.