Nur-Sultanda halyqtyń áleýmettik osal toptarymen jumys isteıtin 8 ortalyq bar
Elordada halyqtyń áleýmettik osal toptarymen jumys isteıtin ortalyqtary birinshi kezekte kópbalaly analardyń, erekshe qajettilikteri bar balalardy tárbıelep otyrǵan otbasylardyń ókilderi bolyp sanalatyn túrli bastamashyl toptardyń usynysymen ashylyp, jumys istep jatyr.
Bul týraly qalalyq Іshki saıasat basqarmasynyń basshysy Dáýren Babamuratov onlaın brıfıngte málimdedi, dep habarlaıdy qala ákimdiginiń resmı saıty.
«Qalada 2020 jyldan bastap túrli bastamashyl toptardyń usynysymen, ákimdiktiń qoldaýymen 8 ortalyq ashyldy. Olar halyqtyń áleýmettik osal toptarymen jumys isteıdi. Bul ortalyqtar tabysty jumys istep keledi. Olardyń qatarynda «Strong Mothers» bilim berý ortalyǵy, «Altyn Shańyraq Uıasy» kıim tigý tsehy, «Baqytty Shańyraq» qyzmet kórsetý boıynsha kópsalaly ortalyq jáne t.b. bar. Bul jumys turaqty negizde júrgiziledi», - dedi Dáýren Babamuratov.
Qala turǵyndaryna yńǵaıly bolý úshin Nur-Sultanda turǵyn úı salasynda qyzmet kórsetetin biryńǵaı ortalyq jumys isteıdi. Bul ortalyqta túrli keńes alýǵa bolady. Mysalǵa turǵyn úı kezegine turý, turǵyn úı kezeginiń nómirin tekserý, turǵyn úı baǵdarlamalaryna kim jáne qandaı talaptar boıynsha qatysa alady, turǵyn úı sertıfıkatyn qalaı alýǵa bolady, kredıttik/jaldamaly páterler máseleleri sekildi túrli saýaldarǵa jaýap alýǵa bolady.
Mundaı ortalyqtar jumysty júıelendirýge jáne «bir tereze» qaǵıdaty boıynsha qyzmet kórsetýge múmkindik beredi. 2019 jyly «Januıa» otbasy ınstıtýtyn qoldaý ortalyǵy ashyldy, onda mamandar azamattarǵa áleýmettik máseleler boıynsha keńes beredi.
Onyń aıtýynsha, Open Akimat aıasynda qalalyq ákimdik bastamashyl toptardyń ókilderimen júıeli túrde kezdesýler ótkizip, týyndaǵan máselelerdi túsindiredi. Sondaı-aq, bastamashyl toptardy qyzyqtyratyn zańnamadaǵy ózgeristerdi túsindirý maqsatynda Parlament Májilisi depýtattarymen, Úkimet ókilderimen kezdesýler uıymdastyryldy.
«Nur-Sultan qalasynda túrli bastamashyl toptardyń árbir suranysymen tıisti, ataýly, ekpindi jumys bar. Ol ylǵı ári turaqty júrgiziledi. Budan basqa, árbir azamat qala ákimi Altaı Seıdirulyna tikeleı júgine alady. Tek 2020 jyldyń ózinde qala ákimi 1200-den astam azamatty jeke qabyldady. 2021 jyldyń birinshi toqsanynda 100-den astam adam elorda ákiminiń jeke qabyldaýynda boldy. Azamattardyń máseleleriniń 70%-dan astamy sol jerde nemese bir-eki kún ishinde sheshiledi. Elorda ákimdigi árdaıym ashyq dep senimmen aıta alamyz, qala turǵyndarynyń múddelerin qozǵaıtyn árbir bastama tyńdaýsyz qalmaı, nazarǵa alynady», — dep túıindedi Dáýren Babamuratov.
Sonymen qatar, ol naýryz aıy elordada «Qaıyrymdy ister» uranymen ótkenin, onyń aıasynda eriktiler qalanyń muqtaj otbasylaryna azyq-túlik sebetterin jetkizgenin eske saldy.
Bıyl Naýryz meıramy qaıyrymdylyq aktsııalary men ıgi ister aıasynda atap ótildi. Mereke kúnderi áleýmettik az qamtylǵan, kópbalaly jáne erekshe qajettilikteri bar balalardy tárbıelep otyrǵan otbasylarǵa tórt myńǵa jýyq azyq-túlik sebeti taratyldy.
Esterińizge sala keteıik, sebetterdi taratý aktsııasy osy jyldyń naýryz aıynda ótkizildi. Oǵan máslıhat depýtattary, Halyk Bank, metsenattar, kásipkerler, eriktiler, sondaı-aq qalanyń belsendi turǵyndary qatysty.
Sonymen qatar, eriktiler muqtaj jandardyń, jalǵyz basty qart adamdardyń aýlalarynyń qaryn kúreýge kómektesti.
Aıta ketý kerek, aktsııalar qatań sanıtarlyq normalar men talaptardy saqtaı otyryp ótkiziledi.