Nur-Sultanda gazben jylytý qazandyqtary iske qosylady
Ol, sonymen qatar qaladaǵy 3-shi jylý elektr ortalyǵynyń qurylysy qaıta jandanatynyn da aıtty.
«Prezıdent Joldaýyna sáıkes, ár óńir ınfraqurylymdyq damý josparyn jergilikti máslıhatta bekitýi tıis. Elordamyz órkendeı túsýi úshin ınfraqurylymnyń jetilýi mańyzdy. Qala halqynyń sany jyl saıyn ósip keledi. Sońǵy 10 jyldyń ishinde elorda halqy 2 esege kóbeıdi. Qazir astanalyqtardyń sany 1 mln 2 júz myńnan asty. ıAǵnı, jyl saıyn halyqtyń sany 50 myńǵa ósip otyr. Sońǵy 3 jyldyń ishinde 8 mln tekshe metrden astam turǵyn úı paıdalanýǵa berildi. Osy oraıda, turǵyn úıdiń kóptep salynýy jylý, sý, jaryq tapshylyǵyna ákelip soǵýy múmkin», - dedi Altaı Kólginov qalalyq máslıhattyń kezekten tys sessııasynda.
Qala ákiminiń aıtýynsha, elordanyń ınfraqurylymyn damytýǵa qarjynyń basym bóligi respýblıkalyq bıýdjetten bólinedi.
«Keıbir máselelerdi jergilikti bıýdjet esebinen sheshýimiz qajet. Aıtar bolsaq, búginde 3-shi jylý elektr ortalyǵynyń qurylysy qaıta jandandy. Onyń qurylysy 10 jylǵa jýyq ýaqyttan beri júrip keledi jáne onyń qujaty eskirgen. Sonymen qatar elordada gazdandyrý protsesi jalǵasyn tabýda. Osyǵan oraı biz ózgerister engizip, qazandyqtardy gazben jylytý júıesine aýystyrdyq. Ol úshin Úkimetten tıisti qarajat bólindi. Bıyl gazben jylytý qazandyqtaryn iske qosýdyń birinshi kezeńin aıaqtaýymyz qajet. Qaladaǵy qurylystyń qarqynyna qarasaq, JEO-3-tiń qýaty jetpeıdi. Sondyqtan da biz gazben jylytý júıesin jobalap jatyrmyz», - deıdi ol.
Sondaı-aq, shahar basshysy ázirge 3 gazben jylytý qazandyǵy bolatynyn aıtty. Qazandyqtar jańa vokzal, áýejaı jáne Jaǵalaý aýdanynda ornalasady.
Aıta keteıik, búgin Nur-Sultan qalalyq máslıhatynyń kezekten tys sessııasy ótip jatyr. Jıynda qalanyń ınfraqurylymdyq damýy, turǵyn úı, balalar qaýipsizdigi, taǵy sol sııaqty máseleler qaralyp jatyr.