Nur-Sultanda «Elorda jastary syılyǵy» baıqaýy ótip jatyr

NUR-SULTAN. QazAqparat – Bas qaladaǵy Beıbitshilik jáne kelisim saraıynda «Elorda jastary syılyǵy» baıqaýy ótip jatyr, dep habarlaıdy QazAqparat tilshisi.

«Búgingiń sharanyń maqsaty – daryndy jastardy qoldap, olardyń jetistikterin halyqa arasynda nasıhattaý jáne báskege qabiletti jas mamandardy anyqtaý. Bir jaǵynan elordanyń jastaryn yntalandyrý. Baıqaý jeńimpazdaryna 100 myń teńgeniń sertıfıkaty tabys etiledi», - dedi qalalyq ákimdiktiń jastarmen jumys bóliminiń basshysy Baqytjan Júnisbekov.

Onyń aıtýynsha, daýys berý ashyq túrde ótti jáne árbir qatysýshy týraly derekter tolyqtaı usynyldy.

«Baıqaý nomınattaryna qoıylǵan alǵashqy talap, ol jas ereksheligi ıaǵnı 14 pen 29 jas aralyǵynda bolýy kerek. Ekinshi kezeńde úmitkerdiń óz salasy boıynsha jyl boıy jasaǵan jumystary men jetistikteri esepke alynyp, olar arnaıy qurylǵan komıssııanyń qaraýyna jiberildi. Komıssııanyń quramynda 15 salanyń bilikti mamandary bar. Atalǵan komıssııa 15 nomınatsııa boıynsha 3-ten 5-ke deıin úmitkerdi tańdap aldy. Odan soń onlaın daýys berý kezeńi bastaldy. Al búgin aqtyq synda eń kóp daýys jınaǵan jeńimpazdar anyqtalady», - dedi ol.

Uıymdastyrýshylardyń aıtýynsha, qyrkúıekte bastalǵan baıqaýǵa 1 myńnan astam ótinim kelip tústi.

«Elorda jastary syılyǵy» 15 nomınatsııa boıynsha tabys etiledi:

1. Estrada

2. Ǵylym

3. Jýrnalıstıka

4. Kıno jáne teatr

5. Ulttyq óner

6. Sport

7. Memlekettik qyzmetker

8. Áleýmettik salanyń úzdik qyzmetkeri

9. Qoǵamdyq qyzmet

10. Óndiristiń úzdik qyzmetkeri

11. Zamanaýı shyǵarmashylyq óner

12. Úzdik stýdent

13. Úzdik jastar teatry

14. Jas kásipker

15. Jyl eriktisi