Nur-Sultanda ekinshi ındýstrııalyq park salynady

NUR-SULTAN. QazAqparat – Elordada ekinshi ındýstrııalyq parktiń qurylysy 2023 jyly bastalady. Bul týraly Nur-Sultan qalasynyń ınvestıtsııalar jáne kásipkerlikti damytý basqarmasy basshysynyń orynbasary Azamat Ábdýálıev aıtty, dep habarlaıdy QazAqparat.

«Qazirgi ýaqytta birinshi parktiń 100% tolǵanyn eskere otyryp, №2 ındýstrııalyq park qurý týraly sheshim qabyldandy. Osy másele boıynsha aldyn ala jospar ázirlendi. Ony daıyndaýǵa sıngapýrlyq JURONG iri kompanııasy tartyldy», - dedi A. Ábdýálıev qalalyq máslıhattaǵy esep berý kezdesýinde.

Onyń aıtýynsha, ekinshi park aýmaǵynda 500 mlrd teńgege 150-ge jýyq jańa ınvestıtsııalyq jobany tartý josparlanyp otyr.

Infraqurylym quny bastapqyda 143 mlrd teńge bolǵan.

Biraq tehnıkalyq-ekonomıkalyq negizdemeni túzetken soń, joba qunyn 88 mlrd teńgege deıin tómendetý josparlanǵan.

«Bul ınfraqurylym bizde 9 iske qosý kesheni bar 3 kezekke bólingen (...) Birinshi kezektegi birinshi iske qosý kesheniniń qurylysyn 2023 jyly bastaý josparlanýda», - dedi Azamat Ábdýálıev.

Parktiń jalpy aýdany – 433 gektar, qurylys jumystary 2030 jylǵa deıin sozylady.