Nur-Sultanda ekinshi ındýstrııalyq park qurylady

NUR-SULTAN. QazAqparat – Elordada ekinshi ındýstrııalyq park úshin 400 gektar jer telimi bólinedi, dep habarlaıdy QazAqparat tilshisi.

Bul týraly elorda ákimi Altaı Kólginov Prezıdent Joldaýyn talqylaý boıynsha qala aktıviniń kezdesýinde málimdedi.

«Memleket basshysy el ekonomıkasyn damytý boıynsha birqatar tapsyrma berdi. Nur-Sultan – Qazaqstan ekonomıkasyndaǵy kóshbasshy qalalardyń biri. Elordanyń áleýmettik-ekonomıkalyq damýyndaǵy negizgi kórsektishterdiń turaqty ósimi baıqalady. Degenmen, artta qalyp qoıǵan kórsetkishtermen de jumys isteý kerek. Alǵashqy toqsanda jalpy óńirlik ónim kólemi 1,2 trıllıon teńgeni qurady. 7 aıdyń qorytyndysy boıynsha, óndiristik ónim kólemi 17,5%, onyń ishinde óńdelgen ónimder - 16% artqan. Sonymen birge, qurylys jumystarynyń kólemi, baspana berý, negizgi kapıtalǵa ınvestıtsııa tartýda artta qalyp kelemiz. Jyl sońyna deıin osy máselelerdi retteý kerek», - dedi A. Kólginov.

Onyń aıtýynsha, «Astana – jańa qala» arnaıy ekonomıkalyq aımaǵyn damytý men qolaıly bıznes ahýal qurý erekshe mańyzdy. №2 ındýstrııalyq parkti qurý jumystary bastalyp ketti.

«Birinshi park is júzinde toldy. Jaqyn arada ekinshi ındýstrııalyq parkke 400 gektar jer telimin bólý jóninde ákimdik qaýlysy shyǵady. Onyń orny anyqtalǵan», - dedi ákim.