Nur-Sultanda DSU-nyń mınıstrlik konferentsııasy ótkizile me – Sultanovtyń jaýaby

NUR-SULTAN. QazAqparat – Koronavırýs ınfektsııasynyń taralýyna baılanysty halyqaralyq deńgeıdegi barlyq is-shara ótkizilmeıdi. Ne bolmasa olar keıinge shegeriledi. OKQ-da ótken baspasóz máslıhatynda Saýda jáne ıntegratsııa mınıstri Baqyt Sultanov málim etti, dep habarlaıdy QazAqparat tilshisi.

«Buǵan deıin jarııalanǵanyndaı, aldyn alý sharalarynyń biri retinde barlyq iri, buqaralyq is-shara bolmaıdy. Astana ekonomıkalyq forýmy bıyl ótkizilmeıdi», - dedi Saýda jáne ıntegratsııa mınıstri.

Baqyt Sultanovtyń aıtýynsha, Dúnıejúzilik saýda uıymynyń 12-shi mınıstrlik konferentsııasyn bıyl Qazaqstanda ótkizý josparlanǵan. Qazaqstandyq tarap qazirgi ahýalǵa baılanysty uıymnyń bas hatshylyǵyna suraý joldap otyr.

«DSU mınıstrlik konferentsııasy boıynsha biz Dúnıejúzilik saýda uıymynyń hatshylyǵymen keńestik. Pandemııa jarııalanǵannan keıin bul suraqty DSU hatshylyǵyna Bas keńestiń kezekti otyrysyna shyǵarýyn suradyq. Sheshimdi 164 eldiń bári qabyldaǵandyqtan bári de óz pikirin bildirýi tıis. Dúnıejúzilik saýda uıymynyń barlyq eli bul problemamen betpe-bet kelip otyr. Soǵan qaraǵanda kele almaıtyn sekildi. Sheshim qabyldaýy úshin hatshylyqqa júgindik. Barlyq iri shara uıymdastyrylmaıdy, ıa bolmasa keıinge shegeriledi. Búkil álemde osylaı. Bul erejeni biz de ustanýymyz kerek», - dedi ol.

Eske sala ketsek, QR Saýda jáne ıntegratsııa mınıstri Baqyt Sultanovtyń Jenevaǵa saparynda Dúnıejúzilik saýda uıymynyń 12-shi mınıstrlik konferentsııasyn Qazaqstanda ótkizý týraly kelisimge qol qoıylǵan edi.