Nur-Sultanda DSU 12-shi mınıstrlik konferentsııasy ótedi

NUR-SULTAN. QazAqparat – QR Saýda jáne ıntegratsııa mınıstri Baqyt Sultanovtyń Jenevaǵa saparynda Dúnıejúzilik Saýda Uıymynyń 12-shi mınıstrlik konferentsııasyn Qazaqstanda ótkizý týraly kelisimge qol qoıyldy, dep habarlaıdy QazAqparat mınıstrliktiń baspasóz qyzmetine silteme jasap.

Jıynda DSU Bas dırektory Roberto Azevedo Qazaqstandy 12-shi mınıstrlik konferentsııasynyń tóraǵasy qyzmetine saılanýymen quttyqtap, halyqaralyq saýda salasyndaǵy jahandyq jıyndy ótkizýde DSU-nyń tyǵyz yntymaqtastyqqa daıyn ekenin jetkizdi.

«Mınıstr Sultanov DSU-nyń aldaǵy Mınıstrlik konferentsııasynyń yqtımal qorytyndysyn talqylaý úshin DSU-ǵa múshe negizgi memleketterdiń Elshilerimen kezdesti. Kezdesýde kópjaqty saýda júıesiniń protektsıonızm jáne birjaqty saýda sekildi syn-qaterlerge tap bolǵanyn atap ótti. Osyǵan baılanysty, mınıstr DSU-ǵa qazirgi syn-qaterler men qajettilikterge tolyq saı kelýge múmkindik beretin mańyzdy sheshimder qabyldaý úshin 2020 jyly Nur-Sultanda belsendi jumys isteýge shaqyrdy», - delingen resmı habarlamada.

DSU 12-shi mınıstrlik konferentsııasynda DSU-ny reformalaý máseleleri, qyzmetterdi retteý, ınvestıtsııalar men elektrondyq saýdaǵa járdemdesý salasyndaǵy jańa jahandyq erejeler jáne balyq aýlaý sýbsıdııalary boıynsha kelissózder taqyryby talqylanady dep josparlanǵan.

«Qazaqstan Dúnıejúzilik saýda uıymyn reformalaý ıdeıasyn qoldaıdy jáne bul reformalar DSU-ǵa múshe barlyq elderge halyqaralyq saýdanyń birkelki básekelestik jaǵdaıyn qamtamasyz etýi tıis degen qaǵıdatty ustanady», - dep habarlady QR Saýda jáne ıntegratsııa mınıstrligi.