Nur-Sultanda buzaqylyq eki esege qysqardy – Altaı Kólginov

NUR-SULTAN. QazAqparat – El astanasynda qylmys deńgeıi azaıyp keledi. Bul týraly elorda ákimi Altaı Kólginov Prezıdent Joldaýyn talqylaý boıynsha qala aktıviniń kezdesýinde málimdedi, dep habarlaıdy QazAqparat tilshisi.

«Jalpy alǵanda, astanada oń nátıje baıqalady. Jyl basynan beri qylmystyń tirkelý deńgeıi aıtarlyqtaı tómendegen, al kóshedegi qylmystar sany 41% azaıǵan. Bul – elge ant bergen pogondaǵy adamdardyń úlken jumysy. Bul – quqyq qorǵaý organdarynyń eńbegi. Segiz aıda buzaqylyq 2 esege, zorlyq-zombylyq – 15 paıyzǵa, adam óltirý – 32 paıyzǵa, densaýlyqqa aýyr zardap keltirý – 17 paıyzǵa azaıǵan», - dedi qala ákimi.

Ákim quqyq qorǵaý organdarynyń jumys tıimdiligin kóterý úshin Prezıdenttiń Іshki ister mınıstrligin reformalaýǵa úsh jylǵa 173 mlrd teńge bólýdi tapsyrǵanyn atap ótti. Bul qarajat eńbekaqyny arttyrýǵa, baspana jaldaýǵa jáne Halyqqa qyzmet kórsetý ortalyǵy ustanymy boıynsha polıtsııanyń zamanaýı front-ofısterin ashýǵa jumsalady. Ákimdik te polıtseılerdiń jaǵdaıyn jaqsartýǵa úlken mán berip otyr.