Nur-Sultanda bıyl kreşenıe rásimi ótpeıdi

NUR-SULTAN. QazAqparat - Bıylǵy epıdemıologııalyq jaǵdaıǵa jáne elordanyń bas sanıtarlyq dárigeriniń qaýlysyna baılanysty Kreşenıe merekesine arnalǵan oıyqtarda dástúrli jappaı shomylý ótkizilmeıdi, dep habarlaıdy ákimdiktiń resmı saıty.

18 qańtardan 19-yna qaraǵan túni pravoslav hrıstıan dinin ustanýshylar úshin Kreşenıe merekesi ótedi. Soǵan qaraı, bıyl epıdemıologııalyq ahýaldyń turaqsyzdyǵyna baılanysty Nur-Sultanda arnaıy oıyq ornatylmaıdy.

«Koronavırýs ınfektsııasynyń taralýyna jol bermeý maqsatynda bıyl kreşenıe merekesine arnalǵan oıyqtarda dástúrli jappaı shomylýǵa tyıym salynǵan. Qulshylyq etý kezinde sanıtarlyq-epıdemıologııalyq talaptar qatań saqtalýy tıis, ıaǵnı ǵıbadathana ishiniń 30%-y ǵana tolýy tıis jáne buqaralyq is-sharalardy ótkizýge mindetti túrde tyıym salyný qajet», - dedi Nur-Sultan qalasynyń Bas memlekettik sanıtarlyq dárigeri Sarhat Beısenova.

Din isteri basqarmasynyń basshysy Nurdáýlet Álmuhanovtyń aıtýynsha, mereke kúnderi shomylýǵa jáne jurtshylyqtyń jınalýyna jol bermeý maqsatynda monıtorıngtik toptar kúsheıtilgen rejımde jumys isteıdi.

Esterińizge sala keteıik, qazirgi ýaqytta elorda koronavırýs boıynsha «qyzyl» aımaqqa ótip ketýdiń aldynda tur.