Nur-Sultanda bıyl 20 myń oryndyq 11 mektep paıdalanýǵa beriledi

NUR-SULTAN. QazAqparat - Elordada bıyl taǵy 20 myńnan astam oqýshyǵa 11 mektep salynady. Sol sııaqty 3 jyl ishinde elordada 34 mektep salyndy. Oqý oryndarynyń qurylysy qalanyń barlyq aýdanynda júrip jatyr, dep habarlaıdy QazAqparat.

«Halyqtyń jyl saıynǵy ósýin eskere otyryp, áleýmettik nysandarǵa, onyń ishinde oqý oryndaryna degen suranys artyp keledi. Josparly túrde oqýshylardy tıisti oqý orndarymen qamtamasyz etý jáne jumys istep turǵan oryndarǵa artylyp jatqan artyq júktemeni alyp tastaý úshin jyl saıyn keminde 10 mektep salý qajet. 3 jyl ishinde 34 mektep salynyp, paıdalanýǵa berildi. Atalǵan oqý oryndary 70 myń oqýshy ornyn qurýǵa múmkindik berdi.

Oqý oryndary qalanyń barlyq aýdanynda salynyp jatyr. Mysaly sońǵy 2 jyldyń ózinde halyq tyǵyz qonystanǵan Esil aýdanynda – 12 mektep, Almaty aýdanynda – 7, Baıqońyr aýdanynda – 4, Saryarqa aýdanynda 2 mektep salyndy. Bıyl qalada taǵy 11 mektep salynady. Atalǵan oqý oryndary qosymsha 20 myńnan astam oqýshy ornyn ashýǵa múmkindik beredi», – dedi elorda ákimi Altaı Kólginov.

Mysaly №65 mekteptiń (Saryarqa aýdany) ereksheligi – munda ınklıýzıvti bilim berý bar. Bul mektepte estý, tirek-qımyl apparaty buzylǵan balalar oqıdy. Munda barlyǵy 3 myńnan astam oqýshy bilim alyp júr, bul oqý ornyna júktelgen tıisti júktemeden asyp túsedi. Mekteptiń qýatyn arttyrý úshin janynan jańa korpýs salynyp jatyr. Ol taǵy 1200 oqýshy ornyn (eki aýysymda) qurýǵa múmkindik beredi.

Sondaı-aq №59 mektep-lıtseıdiń (Saýran kóshesi) aýmaǵynda jańa korpýstyń qurylysy bastaldy. Bıyl barlyǵy 20 myńnan astam oqýshy orny ashylady.