Nur-Sultanda bir top jigittiń kólik urlaǵan sáti vıdeoǵa túsip qaldy

NUR-SULTAN. QazAqparat. – Bir top qylmysker bir tún ishinde alty kólik urlamaq bolǵan. Onyń bireýin urlaǵan sát vıdeoǵa túsip qaldy, dep habarlaıdy QazAqparat Nur-Sultan qalasynyń polıtsııa departamentiniń baspasóz qyzmetine silteme jasap.

«Elorda turǵyny polıtsııaǵa belgisiz bireýler kóliginiń salonyna kirip, jeke zattaryn urlap ketkenin aıtty. Tergeý barysynda anyqtalǵandaı, alkogoldi sýsyn ishken dostar qylmys jasaýǵa kelisken. Tún ortasynda olar Ońtústik-Shyǵys aýmaqta kólik urlamaq bolǵan. Qylmyskerlerdiń nazaryn «VAZ», «Lada» jáne basqa markaly avtokólikter aýdarǵan. Kúdiktiler bir emes, alty kólik urlamaq bolǵan, alaıda bul áreketinen eshteńe shyqpady» delingen polıtsııa departamentiniń habarlamasynda.

Bir kólikti buzyp kirgen 23 jastaǵy jigit kólik rýline otyrǵan. Kelesi kóshege jetkende kóliktiń akkýmýlıatory otyryp qalady.

Basqa kólik tapqan qaskóıler onyń akkýmýlıatoryn sheship, ornatady, alaıda mashınany otaldyra almaıdy.

Sol kezde olar reseılik nómiri bar kólikti kórip, ony aıdap ketpek bolady, biraq bul áreketi de sátsiz bolǵan.

Kúdiktiler otty symdardy jalǵaý arqyly mashınany iske qospaq bolǵan.

Kúdiktiler kilti salonda qalyp qalǵan Golfty aıdap qashyp ketken. Alaıda qala ortalyǵyna jetkende kólik toqtap qalyp, ony ıterýge májbúr bolǵan.

Olar jaqyn jerde turǵan Mercedes júrgizýshisinen kómek surap, otaldyrmaq bolǵan.

Atalǵan fakti boıynsha qylmystyq is qozǵaldy.

Kúdiktiler Nur-sultan qalasy polıtsııa departamentiniń ýaqytsha ustaý ızolıatoryna qamaldy.