Nur-Sultanda bir sýburqaqqa jylyna 38 mln teńge jumsalady

NUR-SULTAN. QazAqparat - Elordanyń bir sýburqaǵyn kútip ustaýǵa jylyna 38 mln teńge bólýdiń esh qajeti joq. Bul týraly búgin «Nur Otan» partııasynyń Nur-Sultan qalalyq fılıaly tóraǵasynyń orynbasary Vladıslav Sergeev aıtty, dep habarlaıdy QazAqparat tilshisi.

«Sýburqaqty tumshalaýǵa jáne qaıta ashýǵa - 38 mln teńge. Biz ótken jyly ádemi ımıdjdik sýburqaqqa óte qomaqty qarjy bóldik. Biraq, biz jyl saıyn 38 mln teńge bóletin bolsaq, onda mundaı sýburqaqtyń qajeti qansha?» - dedi ol Nur-Sultan qalalyq ákimdigi janyndaǵy qoǵamdyq keńes otyrysynda.

Aıta keterligi, qoǵamdyq keńes otyrysynda Nur-Sultan qalalyq strategııalyq jáne bıýdjettik josparlaý basqarmasy basshysynyń mindetin atqarýshy Aıjan Túgelbaeva 2019 jylǵy qala bıýdjeti týraly baıandap, bir sýburqaqty qysta tumshalap, jazda qaıta ashqanǵa 38,6 mln teńge ashqa bólingenin aıtqan edi.