Nur-Sultanda bilim berý mekemeleri qalaı jumys isteıdi

NUR-SULTAN. QazAqparat - Elordada tótenshe jaǵdaı rejımi kezinde bilim berý mekemeleriniń jumys isteý erejesi bekitildi, dep habarlaıdy QazAqparat Nur-Sultan ákimdiginiń resmı saıtyna silteme jasap.

Máselen, menshik nysanyna qaramastan mektepke deıingi bilim berý uıymdary jumysyn shtattyq rejımde saǵat 08.00-den 18.00-ge deıin jalǵastyrýda. Bul rette, qajet bolǵan jaǵdaıda qala komendanty «Tótenshe jaǵdaı týraly» jáne «Azamattyq qorǵaý týraly» QR Zańdarynyń negizinde balabaqshalardyń jumysyn kezekshi toptar rejımine aýystyra otyryp (ata-analardyń nemese zańdy ókilderdiń ótinish-kelisimi negizinde), olardyń jumys kestesine ózgeris engizýge quqyǵy bar.

Menshik nysanyna qaramastan jalpy bilim beretin mektepterde demalys 2022 jylǵy 17 qańtarǵa deıin uzartyldy.

2022 jylǵy 17 qańtardan bastap qala mektepteri shtattyq rejımde 2 aýysymda jumys isteıdi:

1 aýysym – saǵat 08.00-den 13.00-ge deıin,

2 aýysym – saǵat 14.00-den 19.00-ge deıin.

Tehnıkalyq jáne kásiptik bilim berý uıymdarynda, menshik nysanyna qaramastan JOO-da qysqy kanıkýl 2022 jylǵy 6-23 qańtar aralyǵynda jalǵasady.

24 qańtar – ekinshi semestrdiń birinshi kúni, odan ári JOO men orta arnaýly oqý oryndary ádettegi jumys kestesine oralady.

Qosymsha jáne arnaıy bilim berý uıymdary shtattyq rejımde jumys istep tur.

Qajet bolǵan jaǵdaıda, Nur-Sultan qalasynyń komendanty jalpy bilim beretin mektepterdiń, tehnıkalyq jáne kásiptik bilim berý, qosymsha, arnaıy bilim berý uıymdarynyń jumys rejımine olardy qashyqtan oqytý formatyna aýystyra otyryp, ózgerister engizýge quqyly.

Nur-Sultan qalasynyń bilim berý uıymdarynyń jumysyna qatysty qosymsha máseleler boıynsha iKomek qyzmetine «109» nómiri boıynsha habarlasý qajet.