Nur-Sultanda «Beıbitshilik taǵy» atty kórme ashyldy

NUR-SULTAN. QazAqparat – Elordadaǵy QR Ulttyq mýzeıinde «Beıbitshilik taǵy» kórmesiniń tusaýkeseri ótti. Kórme adamzat tarıhyndaǵy eleýli oqıǵalardyń biri – Semeı ıadrolyq polıgony jabylýynyń 30 jyldyǵyna arnalady, dep habarlaıdy QazAqparat tilshisi.

Elordada alǵash ret ótkizilip jatqan «Beıbitshilik taǵy» kórmesinde belgili sýretshi-patsıfıst Gonsalo Mabýndanyń (Mozambık) «Taq» jáne «Maska» atty erekshe jumystary usynyldy.

Músinderdiń basty ereksheligi – deaktıvti qarý-jaraqtardyń qaldyqtarynan jasalýynda.

Gonsalo Mabýnda agressııa quraldaryn óner týyndylaryna aınaldyryp, adamzatty beıbitshilikke úndeıdi.

Kórmeniń ashylý saltanatyna «Degdar» gýmanıtarlyq qory Qamqorlyq keńesiniń tóraǵasy Darıǵa Nazarbaeva, Qazaqstan sýretshileri akademııasynyń prezıdenti Amandos Aqanaev, QR Mádenıet jáne sport vıtse-mınıstri Nurǵısa Dáýeshov, Nur-Sultan qalalyq mádenıet basqarmasynyń basshysy Nurlan Álimjanov, Á.Qasteev atyndaǵy Memlekettik óner mýzeıiniń dırektory Gúlmıra Shalabaeva, «Eýrazııalyq mádenı alıans» EKU kýratory Vladıslav Slýdskıı jáne basqa da qoǵam men óner qaıratkerleri qatysty.

«Gonsalo Mabýndanyń «Taq» jáne «Maska» músinderi negiz bolǵan búgingi kórmeniń máni zor. Sýretshi-patsıfıst Gonsalo Mabýnda óziniń týǵan jeri Mozambıkte uzaq jylǵy azamattyq soǵystyń aýyr zardabyn basynan ótkerdi. Beıbit zaman ornaǵannan keıin ol avtomattar, snarıadtar men atylǵan gılzalardan erekshe músinderdi jasap, surapyl soǵystyń qarý-jaraqtaryn óner týyndylary retinde usyndy. Qazirgi ýaqytta soǵys oty tutanyp, zorlyq-zombylyqtan zardap shegip júrgen el kóp. «Beıbitshilik taǵy» kórmesiniń ıdeıasy óner tili arqyly barsha adamzatty soǵystan bas tartyp, tatýlyq pen kelisimge úndeýdi kózdeıdi», - dedi Darıǵa Nazarbaeva.

Іs-sharanyń tusaýkeserine qatysqan qoǵam qaıratkerleri men ónertanýshylar «Beıbitshilik taǵy» kórmesi tatýlyq pen kelisimniń mánin, beıbit ómirdiń basty qundylyqtaryn baǵalaýǵa zor yqpalyn tıgizetinine basa nazar aýdardy.

«Kórmede Qazaqstan, AQSh jáne Afrıka sýretshileriniń jumystary da usynylǵan. Gonsalo Mabýndanyń týyndylary sııaqty bul shyǵarmalarda da týǵan jerge súıispenshilik, tarıhqa taǵzym taqyryptary qozǵalǵan. Uıymdastyrýshylar Semeı ıadrolyq polıgony jabylýynyń 30 jyldyǵyna arnalǵan jeke bólim de ázirlegen. Ekspozıtsııada 25-ten astam otandyq jáne sheteldik sheberlerdiń týyndysy jınaqtalǵan. Olardyń qatarynda Aısha Ǵalymbaeva, Amandos Aqanaev, Ábdirashıt Sydyhanov, Ámen Haıdarov syndy qazaq óneriniń maıtalmandary bar», - dep atap ótedi «Degdar» gýmanıtarlyq qorynyń baspasóz qyzmetinen.

Aıta keterligi, «Degdar» gýmanıtarlyq qory, QR Mádenıet jáne sport mınıstrligi, Nur-Sultan qalasynyń ákimdigi uıymdastyrǵan kórmege qoıylǵan músinder QR Ulttyq mýzeıge syıǵa tartylmaq.

Al kórmeni qala turǵyndary 23 qazanǵa deıin tamashalaı alady.