Nur-Sultanda Aýyl sharýashylyǵy mınıstrliginiń ǵımaraty MMÝ fılıalyna beriledi
Buǵan deıin Memleket basshysy Qasym-Jomart Toqaev M. V. Lomonosov atyndaǵy Máskeý memlekettik ýnıversıtetiniń Qazaqstan fılıalyn 20 jyldyǵymen quttyqtap, fılıalǵa jańa ǵımarat beriletinin aıtqan edi.
«Memleket Basshysy Qasym-Jomart Toqaevtyń tapsyrmasymen el Úkimeti M. V. Lomonosov atyndaǵy Máskeý memlekettik ýnıversıtetiniń fılıalyna QR Aýyl sharýashylyǵy mınıstrliginiń 13 myń sharshy metr bolatyn 15 qabatty keńsesin berý týraly sheshim qabyldady. Bul bizge reseılik áriptestermen birge basym mamandyqtar boıynsha joǵary bilikti mamandardy daıarlaý tizimin keńeıtýge múmkindik beredi dep oılaımyn. Sondyqtan aldaǵy jańa jylda sizderdi jaǵymdy ister kútip tur», - dedi Memlekettik hatshy MMÝ Qazaqstan fılıalynda ótken mereıtoı keshinde.
Qyrymbek Kósherbaev MMÝ Qazaqstan fılıalynyń ujymyna zor densaýlyq, baqyt, shyǵarmashylyq tabys, bilim men ǵylymdaǵy jańa belesterdi baǵyndyrýdy jáne Qazaqstan men Reseıdiń órkendeýin tiledi.
Sondaı-aq, saltanatty jıyn barysynda Memlekettik hatshy M.V. Lomonosov atyndaǵy MMÝ Qazaqstan fılıalynyń dırektory Aleksandr Sıdorovıchke «Qazaqstan Táýelsizdigine 30 jyl» mereıtoılyq medalin tabys etti.
Aıta keteıik, M. V. Lomonosov atyndaǵy MMÝ Qazaqstan fılıaly QR Tuńǵysh Prezıdenti - Elbasy Nursultan Nazarbaevtyń bastamasymen jáne RF prezıdenti Vladımır Pýtınniń qoldaýymen qurylǵan.
2000 jylǵy 9 qazanda Reseı Federatsııasynyń Prezıdenti V.V. Pýtınniń Qazaqstan Respýblıkasyna jasaǵan memlekettik saparynda MMÝ rektory, akademık V.A. Sadovnıchıı men QR Bilim jáne ǵylym mınıstri Q.E.Kósherbaev Astana qalasynda L.N.Gýmılev atyndaǵy Eýrazııalyq ulttyq ýnıversıtettiń bazasynda M.V. Lomonosov atyndaǵy Máskeý memlekettik ýnıversıtetiniń Qazaqstan fılıalyn qurý týraly hattamaǵa qol qoıǵan bolatyn.