Nur-Sultanda Ashyq jobasy úı karantınin buzǵan 189 adamdy anyqtady

NUR-SULTAN. QazAqparat – Sáýir aıynda elordada Ashyq jobasy arqyly úı karantınin buzǵan 189 adam anyqtaldy. Bul týraly Nur-Sultan qalasynyń bas memlekettik sanıtarlyq dárigeri Sarhat Beısenova aıtyp berdi, dep habarlaıdy QazAqparat tilshisi.

«Koronavırýs ınfektsııasyn tirkeýdiń jalǵasýynyń negizgi sebepteri – turǵyndardyń karantın sharalaryn saqtamaýy, atap aıtqanda adamdar kóp jınalatyn oryndarǵa barý, maska taqpaý jáne negizgi sebepterdiń biri ambýlatorııalyq naýqastardyń da, jaqyn baılanysta bolǵan adamdardyń da úı karantıni rejımin saqtamaýy bolyp otyr», - dedi S. Beısenova elorda ákimdiginde ótken brıfıngide.

Onyń aıtýynsha, úı karantıninde otyrǵan keı adamdar tyıym salynǵanǵa qaramastan talapty buzyp júr.

«Bul olardyń Ashyq jobasyna qatysatyn nysandarǵa barýymen rastalyp otyr. Sáýir aıynda ǵana úı karantınin buzýshylardyń 189-y, onyń ishinde 89 naýqas jáne 100 baılanysta bolǵan adam anyqtaldy», - dedi Sarhat Beısenova.

Aıta keteıik, elimizde Ashyq pılottyq jobasyn qoldaný arqyly teatrlar men karaokelerdiń, banket zaldarynyń qaıta jumys isteýine ruqsat berilgen. Elordada Ashyq jobasyna engizilgen 91 kásipkerlik sýbektisi «jasyl aımaq» talaby boıynsha jumys isteıdi.