Nur-Sultanda alǵash ret Eýrazııa astanalary jazýshylarynyń forýmy ótedi
Qala kúnine oraı uıymdastyrylyp jatqan forýmdy Jazýshylar odaǵynyń Nur-Sultan qalalyq fılıaly men «Altyn qazyna» qoǵamdyq birlestigi ótkizbekshi.
Ortalyq kommýnıkatsııalar ortalyǵynda ótken arnaıy brıfıngte Nur-Sultan qalasy mádenıet basqarmasy basshysynyń orynbasary Nárımash Muhambetalına elordada dál osyndaı forým ótkizetin kez ábden jetkenin aıtty.
«Bul sharany tarıhı oqıǵa dep aıtýǵa bolady. 20 memleketten astanalyq jazýshylar qatysqaly otyr. Ispanııa, Egıpet, Úndistan, Ázerbaıjan, Reseı, arab memleketterinen ataqty jazýshylardy shaqyrdyq. Forýmnyń maqsaty óte bıik. Ult ádebıetin barsha álemge nasıhattaýǵa úlken jol ashatyn forým bolmaq. Qala kúnine ushtastyrylǵan sharalardyń sany kóp. Solardyń arasynda bul forýmnyń shoqtyǵy bıik», - dedi Nárımash Muhambetalına.
Jazýshylar odaǵynyń Nur-Sultan qalalyq fılıalynyń dırektory Dáýletkereı Kápuly bul forým Nur-Sultan qalasynyń ádebı ımıdjin kóterip, ózge eldermen ádebı baılanysty nyǵaıtýdy kózdeıtinin aıtady.
«Qazir ádebı agentter týraly jıi aıtylyp júr. Bizdiń qazaq ádebıetiniń álem ádebıetimen baılanysy týraly da kóptegen máseleler bar. Ótken jyly Qazaqstan jazýshylar odaǵy Eýrazııa qalamgerleriniń aýqymdy forýmyn ótkizgen bolatyn. Keńes dáýirinde álem ádebıeti men qazaq ádebıetiniń baılanysy naqty jolǵa qoıylǵan bolatyn. Táýelsizdik jyldary bul is sál aqsap qaldy. Memleket tarapynan qazaq ádebıetin UNESCO tizimindegi 6 jetekshi tilge aýdarý qolǵa alynyp jatyr. Ol úshin aýdarma bıýrosy da quryldy», - deıdi fılıal dırektory.
Onyń aıtýynsha, forýmǵa qazaqtyń 100 aqynyn ıspan tiline aýdarǵan madrıdtik aqyn Hýsto Horke Padron shaqyrylǵan.
«Kelesi jyly Abaıdyń 175 jyldyq merekesin keń kólemde atap ótemiz. Erteń sol ıspan aqynymen memorandýmǵa qol qoıamyz. Abaı óleńderin ıspan tiline aýdarýǵa kelisip otyr. Abaı atamyzdyń óleńin kez kelgen aqyn aýdarmaýy kerek. Sondyqtan forýmdaǵy súıinshilep aıtatyn jańalyǵymyzdyń biri - osy. Birikken Arab Ámirlikteri, Aýǵanstan Islam Respýblıkasy, Qyrǵyz Respýblıkasy jazýshylar odaǵynyń tóraǵalary da osy forýmǵa qatysady. Oljas Súleımenov bastaǵan qazaqtyń aqyn-jazýshylary osy forým ortasynda bolady», - deıdi Dáýletkereı Kápuly.
Brıfıngke qatysqan jazýshy Álibek Asqar men aqyn Nesipbek Aıtuly da astanalyq jazýshylar forýmynyń elorda ádebıetiniń tynysyna tyń serpin syılaıtynyn aıtty.
Dáýletkereı Kápulynyń sózinshe, forýmda kitap marketıngi men avtorlyq quqyq, ádebı agent isin damytý máselesi de talqylanady. Atalmysh máseleler poezııa, proza, drama sektsııalarynda jeke-jeke taldanbaq.