Nur-Sultanda 1000-nan astam úleskerge páter kilti tapsyrylady

NUR-SULTAN. QazAqparat - Táýelsizdiktiń 30 jyldyǵy qarsańynda qurylysy uzaqqa sozylǵan aýqymdy «Shyǵys» turǵyn úıi aıaqtalýda.

Kóppáterli turǵyn úı kesheni birneshe kezekten turady, onda úleskerlerdiń eń kóp sany shoǵyrlanǵan – shamamen 2,5 myń otbasy. Birinshi kezekte «Shyǵys» TK qurylysy aıaqtalyp, qazir 800-ge jýyq úlesker óz páterlerinde turyp jatyr, al qujattardy resimdeý protsesi júrgizilýde. Bıyl barlyǵy 57 turǵyn úıdiń qurylysy aıaqtalady, osylaısha 7500-den astam úleskerdiń máselesi sheshiledi, dep habarlaıdy qala ákimdiginiń resmı saıty.

Búgingi tańda «Shyǵys» TK 2 jáne 3-kezektegi 1047 úleskerge jóndeý jumystaryn júrgizý úshin kiltteri berilip jatyr.

«Shyǵys» TK qalǵan 1058 úleskeriniń tórtinshi jáne besinshi kezeginiń máselelerin ekinshi deńgeıli bankpen jáne ınvestormen «qonys aýdarý» jobasy boıynsha jasalǵan kelisim aıasynda sheshý josparlanyp otyr. Al 4, 5-kezektegi jáne 2B úleskerleri «Shyǵys» TK, sondaı-aq «Jaǵalaý-4» TK 1-polıgon, 2-polıgon daıyn turǵan «Shyǵys» TK 3A jáne 3B nysanyna kóshiriledi.

Memleket basshysynyń tapsyrmasy boıynsha elorda ákimdigi uzaq qurylys jumystaryn aıaqtaý boıynsha júıeli jumys júrgizýde.

Osylaısha, osy bloktarda qurylysty qaıta bastaý úshin qajetti rásimder júrgizildi: obektiniń tehnıkalyq tekserý qorytyndysy alyndy, qarjylyq aýdıt júrgizildi, qurylys salýshy anyqtaldy.

Nysannyń barlyq 17 blogynda monolıtti jumystar, tas qalaý jumystary júrgizildi, syrtqy ınjenerlik jeliler tartyldy, tereze bloktary jaılastyryldy, ishki árleý jáne qasbetti ornatý jumystary júrgizildi. Kún salqyndaǵanǵa deıin abattandyrý jáne shaǵyn sáýlet nysandaryn ornatý jumystary júrgizildi.

«Búgin bizde qos mereke. Segiz jyldan beri kútken páterimizdi aqyry aldyq. Bul – memlekettiń úlken eńbeginiń nátıjesi», - dedi Ermuhamet. Men endi ǵana eks-úlesker ekenimdi sezinip otyrmyn. Sondaı-aq, osyndaı aıtýly kúni, Qazaqstannyń Táýelsizdik kúni páterimizdiń kiltin alyp otyrmyz. Osy jumysqa qatysqandardyń bárine dán rızamyn. Elbasyǵa, Prezıdentke jáne barlyǵyna alǵysym sheksiz», - dep óz áserimen bólisti Larısa.

Osylaısha, bıyl 57 turǵyn úıdiń qurylysy aıaqtalady, nátıjesinde 7 500-den astam úleskerdiń máselesi sheshiledi.

2019-2020 jyldary 33 kóppáterli turǵyn úı kesheni salynyp, paıdalanýǵa berildi. 5 myńnan astam úlesker otbasy kópten kútken qonys toıyn toılady. 2022-2023 jyldary qurylysy uzaqqa sozylǵan qalǵan úılerdi aıaqtaý josparlanyp otyr. Uzaq qurylystyń árbir nysany boıynsha qadamdyq is-sharalar jospary bar.